Extra | KFO: Ningun berdat no por spanta nos (1)

WILLEMSTAD.- Kòrsou Fuerte i Outónomo ta bisa ku nan no tin miedu di niun bèrdat. E bèrdat no por spanta nan sigur ku no. KFO ta bisa ku hopi tin miedu ku e union entre e partidonan polítiko PAR i MAN lo pone e derechi di pueblo pa disidí den un plebisito, esta pa evaluá den un referèndem e leinan di konsenso, na peliger.

Nada por evitá ni stroba moveshon NO di logra un referèndem. E kombinashon PAR-MAN ta unu mas ku remarkabel. Partido PAR ta ligá ku e fundamentu ekonómiko ku tin gran importansia pa nan ideologia. Nan ta obligá pa dirigí mayor parti di nan esfuerso pa sigurá eksistensia di e klase dominante dor di konservá nan privilegionan i yuda krese nan fortuna.

Esei ta filosofia di tur partido derechista kapitalista. Un polítika ku no ta dirigí pa hasi e debil mas fuerte. Ademas di esei PAR ta konta ku sosten di Ulanda i p’esei e mester defendé e polítika di e gobièrnu di Ulanda. E polítika ei no ta nada otro ku mantené e sistema kolonial di e leinan di konsenso ku a kombertí un pais ku su propio podernan rumbo bèk pa kolonia. MAN mester sa ku diálogo riba referèndem no ta posibel ku partido PAR ku a yuda krea e struktura aktual.

Partido MAN, inkluso nan lider, den gran mayoria, resientemente, a firma pa un referèndem nobo i limpi. Of nan a skonde nan berdadero pensamentu i a falsifiká nan intenshon pa haña voto? No tin niun posibilidat ku por interpretá nan firma di otro forma.

KFO ta sigui bisa ku di tur animal ta e humano so tin konsenshi moral, apesar ku e animal polítiko hopi biaha ta mustra diferente kara. MAN a primintí, anunsiá, firma i komprometé su mes ku e kousa aki. MAN semper a forma parti di e frente uníe i anti lei di konsenso i a yuda promové e frente ku ta inkluí independistanan, sosialistanan i outonomistanan, kon tal ku nan ta oponé leinan di konsenso. Integrantenan di MAN tambe e tuma sla na WTC. Awor MAN ke forma gobièrnu ku e mes un partido ku a apoyá, ordená i tolerá violensia kontra movementu NO.

Polítikonan ta separá i despues ta brasa otro atrobe dependiendo di nan nesesidat pa okupá puesto públiko i pa asina probechá di abundansia ku un presupuesto ta trese kuné. E voto pa MAN, pa un gran parti, tabata un voto pa libertat i un protesta kontra e leinan di konsenso. Apesar di esaki, ku su viktoria elektoral, e ta skohe pa goberná ku un partido ku ke mantené e status quo. Un bòltumentu ku no a laga di sorprendé hopi. Sigur despues di nan diskurso pro independensia.

Aparentemente nan a bandoná nan promesa pa lealtat na un kousa hustu i a ofresé nan servisionan na partido PAR. Huntu ku nos nan a uni pa eksigí un status ku ta digno pa nos pueblo, por lo ménos igual na Ulanda i Aruba den e supuesto Reino aki. Ku nos propio Banko Sentral i nos mes Prokuradó General, bou di nos mes gobièrnu i nos mes parlamento, manera mester ta den un demokrasia real. Ta manera oportunismo polítiko lo bolbe triunfá riba prinsipio.

Tur esaki ta desorientá e yu di Kòrsou ku e meta pa debilitá resistensia kontra e leinan kolonial. Nos no mester di komprondementu di ningun partido polítiko. No por ninga referèndem sin pone na peliger pas i trankilidat den e pais aki. KFO ta bisa “Nos mester haña nos podernan bèk i sòru pa nos ta responsabel. Asina so por terminá e diskushon riba e status aktual. E leinan ku ta mina nos podernan outónomo no ta akseptabel den un pais manera esun di nos, ku un sivilisashon mas bieu ku esun di e pais dominante i ku un kultura por lo ménos igual.

Nos ta fiel na nos mishon i nunka lo konformá. No defendé nos interes ta igual ku traishon. Nos no ke leinan ku ta ilimitá nos yunan den nan desaroyo komo hende liber, pasobra nos no a kumpli ku nos deber den historia. Kualke deklarashon di e kombinashon remarkabel di MAN i PAR aki lo ta solamente pa hoga opinion públiko. Nan portabosnan lo trata na dèsakreditá e lucha pa un referèndem nobo i limpi. Maske nos no ta grandi ni na teritorio ni na poblashon, nos mester ta grandi na vanguardia di nos mes podernan estatal”.

Pa KFO ta un privilegio di ta forma parti di e lucha aki ku ta algu fundamental den nos bida. Patriotismo ta boluntat i esfuerso. No sakrifisio. Paso pa nos e deber aki no ta sakrifisio. Deber ta bida. E soño nunka lo muri te ora nos haña e pais deseá. Nos ta kla pa bai guera ku e bloke oportunista aki tambe.

Bron: Extra