WILLEMSTAD.- Kòrsou Fuerte i Outónomo ta splika ku niun hende por stroba e votadó di saka potrèt di su voto. Saka portrèt ku telefòn den hòki di votashon no ta prohibí.

Minister di Relashonnan den Reino Ronald Plasterk for di 29 di yanüari 2014 a anunsiá públikamente ku niun hende no por stroba otro di saka portrèt di su propio voto i repartí i kompartí esei ku es ku e ke. Ni komo medida di òrdu ni di ningun otro forma. E kos ta huridikamente masha simpel.

KFO ta sigui bisa ku legislador formal, meskos ku ta e kaso na Ulanda, no a traha regla tokante uso di telefòn selular den lokalidat di votashon. P’esei minister Plasterk, kaminda ta meskos, a akordá i anunsiá repetidamente i ofisialmente ku uso di telefòn pa saka portrèt den hòki di votashon ta permití sin mas i kompletamente legal. E la bisa literalmente i konfirmá via Twitter, ku e no ta manda niun hende bai hasié, pero ku tin mag di saka, manera nan ta yam’é na Ulanda, ‘stemfie’ dia di elekshon i mustr’é na ken ku e persona en kuestion ke. Gobièrnu ulandes dia 1 di mei 2014 den korte na Den Haag te hasta a alegá, ku sakamentu di portrèt den hòki di votashon pa despues kompartí esei ku otronan tin hasta hopi bentaha, mirá for di interes general pa ku elekshon. E siudadano, ku ta mustra otro kon el a vota, por ta te hasta un estímulo pa otronan bai vota. Mas importante ainda ta e libertat di ekspreshon, un derechi fundamental di tur votadó.

E derechi aki ta enserá ku tur siudadano ta liber i e mes tin mag di disidí kon e ta anda ku su derechi di voto i kon e ta ekspresá esei. Na Ulanda e minister di Relashon di Reino Plasterk a enfatisá ku di ningun manera por prohibí ‘stemfies’, despues ku e la laga hasi investigashon hurídiko profundo di esaki.

Un prohibishon pa saka portrèt òf mustra portrèt di riba ken a vota ta dirigí n’e siudadano i p’esei kualke prohibishon mester tin un base konkreto den un lei formal. Ni na Kòrsou ni na Ulanda un lei asina no ta eksistí.

P’esei KFO ta bisa na tur ku, pa motibunan netamente polítiko , ke spanta yu di Kòrsou ilegalmente ku violashon di normanan ku apsolutamente no tin ningun base legal, inklusive esnan ku no mag malusá nan poder di e forma ilegal aki den nan mes pais, esta Ministerio Públiko, nos tin un mensahe so a la Rutte: ‘Pleurop’.

Meskos tambe KFO ta eksigí ku Konseho Elektoral ta rektifiká su mal informashon na pueblo votadó di Kòrsou. No tin ningun base legal ni pa prohibí ni pa listra ningun votadó ora e ta ehersé su derecho fundamental di vota òf ekspresá su mes.

Bron: Extra