WILLEMSTAD.- Despues di un periodo di preparashon largu i intensivo di parti di tantu skol, direktivanan di skol komo e Sentro di Expertisia pa Prueba & Eksamen (ETE), 2317 (2016: 2460) kandidato pa èksamen di 22 skol di Kòrsou ta kuminsá ku nan èksamen sentral final pa VSBO, HAVO, VWO.
Djaluna 08 di mei 2017, ta kuminsá e periodo di èksamennan sentral final pa 578 kandidato pa èksamen HAVO i 193 pa VWO di Enseñansa Avansá.
Eksamennan VSBO ta kuminsá djárason 10 di mei 2017 pa 1546 kandidato di kua tin 452 VSBO-PBL, 427 VSBO-PBL i 667 VSBO-TKL kandidato pa èksamen ku ta bai pasa èksamen final. Durante mas ku tres siman kandidatonan pa èksamen na Kòrsou lo traha nan èksamen ku lo determiná si nan a sera nan periodo na VSBO òf HAVO òf VWO ku éksito. Hopi lo sigui, despues di e éksito akí, ku un estudio den un instituto di enseñansa mas avansá adekuá, sea lokalmente òf na otro pais.
E kantidat di mas grandi di studiantenan ta bini di enseñansa profeshonal sekundario preparatorio (VSBO).
E aña aki ta di 14 biaha ku tin èksamennan final pa VSBO (sistema nobo). Den VSBO ta hasi distinshon entre tres trayekto edukativo: PBL (Trayekto edukativo Profeshonal Práktiko), PKL (Trayekto edukativo Práktiko pa formashon di Kader) i TKL (Trayekto edukativo Teóriko pa formashon di Kader).
E grupo di kandidato di mas grandi ta pasa èksamen TKL, esta 667, 87 ménos ku e aña anterior. Pa PKL esaki ta 427, un bahada di 44 kompará ku aña pasá i PBL 452, kual ta un subida di 37 kompará ku aña pasá.
Na total tin 15 skol VSBO na Kòrsou ku ta pasa e èksamen final. Kompará ku aña pasá e kantidat di kandidatonan pa èksamen HAVO ku e aña akí ta pasa èksamen na Kòrsou ta algu ménos, esta 578, 58 ménos. Pa VWO tin 193 kandidato ku ta pasa èksamen final e aña aki, kual ta 9 mas ku aña pasá. E kantidat total di skolnan HAVO i VWO ku ta partisipá ta 7: 7 di nivel HAVO i 6 di nivel VWO.
Roster pa èksamennan sentral
Pa HAVO i VWO e èksamennan di promé periodo ta kuminsá djaluna 08 di mei 2017 ku e èksamen sentral ‘Informátika’. VSBO pa tur trayekto edukativo, PBL, PKL i TKL, ta kuminsá djárason 10 di mei 2017 ku e èksamen sentral ’Hende i komunidat 1,2’.
E periodo di èksamen pa loke ta trata e promé periodo pa VSBO ta finalisá djárason 24 di mei 2017 ku e èksamen sentral ‘Spañó’ pa tantu trayektonan edukativo PBL, PKL komo pa TKL.
Pa HAVO i VWO e periodo di èksamen pa e promé periodo ta finalisá djaluna 29 di mei 2017 ku e èksamen sentral ‘Kunstvak algemeen’.
E di dos periodo, esta repaso di èksamen, pa e èksamennan práktiko VSBO ta tuma lugá den e periodo di 8 te ku 14 di yüni 2017. Pa èksamennan sentral teorétiko final VSBO,
HAVO i VWO, e di dos periodo ta di 19 te ku 23 di yüni 2017.
Resultado èksamennan final
ETE ta responsabel tambe pa fiha e normanan di e èksamennan. Esaki ta tuma lugá basá riba un método sientífiko.
E normanan pa e promé periodo di èksamen di ETE lo ta konosí i ta manda esakinan pa skolnan VSBO mas tardá djamars 13 di yüni 2017 i pa VWO i HAVO djárason 14 di yüni 2017. E normanan pa èksamennan ku ta bini for di Ulanda tambe lo ta konosí djárason 14 di yüni 2017.
Ta spera ku resultadonan di èksamennan final promé periodo ta mas tardá djaweps 15 di yüni 2017.
Kandidatonan di èksamen ku a pasa e èksamen di nobo, por spera nan resultado pa mas
tardá djabièrnè 30 di yüni 2017.
Bron: Extra