Extra | ‘Komo presidente mi persona tabata bou di intimidashon i menasa’

‘Komo presidente mi persona tabata bou di intimidashon i menasa’ | Extra

WILLEMSTAD,- ‘Pa mi tabata un honor i privilegio pa traha komo presidente di Parlamento, ounke e tabata pa un tèmpo kòrtiku. Tabata un honor pa sirbi e pais na un manera digno i demokrátiko den e órgano mas importante di nos pais.

No tabata fásil, mi ta tin un parlamento kaminda dado momentu en bes di nos por yega na kosnan konkreto pa bienestar di pais aki komo ‘role models’ pa tur di esnan ku a sigui nos, hopi bia ku bèrgwensa mi mester a sera e reunion i atmití ku nos no a logra pa yega na kalidat i rèspèt pa e pais aki.’

Mc William: ‘No opstante di esei mi a sigui hasi mi trabou. Hopi bia ku hopi humiashon i intimidashon. No solamente durante reunionnan. Ta un kos ku mi no a bisa nunka, mi no a papia nunka. Hopi hende a kuestioná mi riba diferente manera ku mi a aktua durante reunionnan. Pero hopi di bosnan sa ku pafó di reunion, e famia ku mi tin i mi persona, tabata bou intimidashon i bou di menasa komo hende muhé i komo presidente di Parlamento.’ Asina Giselle Mc William a bisa ayera durante un rueda di prensa bon bishitá.

‘Dia ku mi a wòrdu asigná komo presidente di Parlamento, mi a bisa den mi spich ku mi tin un responsabilidat hopi grandi pa salbaguardiá nos demokrasia. Mi no a buta esaki na banda, no opstante kuantu bia nan a intimidá mi i purba hinka mi den huki pa mi ta kometé fayonan den mi reglamentu di órden ku despues nan por tilda mi di dje i usa kontra di mi.’
Mc William: ‘Nan a yama mi diktador. Pero mi a duna hopi tempu pa papia, mi a duna espasio pa ekspresá nan frustrashon. Mi a duna espasio pa trese tur kos dilanti.’

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *