WILLEMSTAD.- Den e ‘Heads of Agreement’ ku Gobièrnu di Kòrsou a firma djasabra anochi pasá ku e kompanianan Guangdong Zhenrong Energy Co. Ltd (GZE) i China Zhenrong Holding Limited (CZR), tin hopi atenshon ku kreamentu di kupo di trabou pa abitantenan di Kòrsou.

Asina gobièrnu di Kòrsou ta splika den e komunikado.

GZE lo invertí den desaroyo di abitantenan lokal, a base di un Workforce Development Plan ekstenso, ku lo pèrkurá pa mas tantu posibel hendenan lokal keda entrená i empleá pa hasi trabounan direkto i indirekto di ‘upgrade’ na e refineria i e terminal di petrolio. E plan aki mester ta kla riba 30 di aprel 2017.

Gobièrnu ta interesá tambe den mantenshon di empleo eksistente. Na Refineria Isla mes ta garantisá un mínimo di 1.200 empleo, i ademas profeshonalnan lokal lo forma parti di gerensia. Lo introdusí un regla ku trahadónan di kontratista lo risibí pago i kondishonnan ku ta igual na esun di trahadónan di Refineria Isla. Komo operador nobo GZE ta komprometé su mes tambe pa negoshá CAO ku e sindikatonan i invertí den training i skol di fishi.

Otro puntonan importante ku ta reflehá den e ‘Heads of Agreement’ tin entre otro di aber ku e forsa finansiero di GZE. Awor ku a firma e ‘Heads of Agreement’, GZE tin 28 dia pa entregá un ‘Letter of Intent’ di un banko di bon reputashon komo prueba ku GZE ta finansieramente viabel. Un otro fecha importante ta 30 di aprel 2017, ya ku esaki ta e ‘deadline’ pa GZE entregá e promé konsepto di su plan tékniko di proyekto den kua tin reflehá e asina yamá Front End Engineering Design, o sea “FEED”.

Bron: Extra