WILLEMSTAD.- Kompanianan ku tin wega di azar via di UTS a pidi ekstenshon di wega ku dos siman. Dia 12 yüni último, UTS a anunsiá ku pa dia 1 di ougùstùs último nan ta finalisá kompletamente ku e portafolio spesífiko aki.
Sinembargo EXTRA a tuma nota ku un dje kantornan di number ku tin wega di azar via di UTS via di e number di SMS 2020, kual ta Robbie’s Lottery, su weganan a kontinuá normalmente dia 1 i 2 ougùstùs.
EXTRA a papia ku direktor di UTS, Sr. Paul de Geus riba e echo ku tòg por a sigui kumpra number via di SMS 2020, i e direktor, sin ke a bai riba niun kompania spesífiko, a indiká ku UTS a haña petishon di sierto kompanianan di wega di azar pa ekstendé e servisio aki pa dos siman mas. E petishon di ekstenshon ta pa e kompanianan por kaba di atendé un ke otro. UTS a honrá e kompanianan aki e petishon di ekstenshon di dos siman mas di wega di azar via number SMS di UTS, sr. de Geus a bisa.
Manera indiká dia 12 yüni UTS a anunsiá ku kontinuamente nan mester evaluá, adaptá i modernisá nan aktividatnan empresarial.
Den e retonan di UTS tin e parti di sektor di wega di azar na Kòrsou ku kontinuamente tabata den lus negativo e último añanan.
UTS ta sigui splika ku di un forma kompletamente robes tabata krea hopi biaha e impreshon ku UTS tabata ofresé òf partisipá den ofresé weganan di plaka òf ku UTS no tabata tene su mes na e lei i reglanan vigente. E tipo di publisidat negativo aki ta tacha, no únikamente e aktividatnan empresarial di UTS, pero tambe e bon nòmber i reputashon di UTS, tantu lokal komo internashonal.
Esaki no ta na interes di UTS i esnan ku ta hasi negoshi ku UTS. Por parte, enbista di e impakto negativo di ofresementu di servisio relatá na infrastruktura na provedó di wega di azar, aña pasá ougùstùs, UTS a disidí di stòp di ofresé e servisionan spesífiko aki, te kaminda lei di telekomunikashon ta permití. Entrante promé di ougùstùs 2017, UTS ta finalisá kompletamente ku e portafolio spesífiko aki. Sinembargo e kompanianan di wega di azar a pidi ekstenshon di dos siman pa kaba di regla nan asuntunan.
Bron: Extra