WILLEMSTAD. – Na luna di Yüni último a tuma lugá na Ulanda, firmamentu di un MOU (‘Memory of Understanding’), ku ta un akuerdo di koperashon entre Reino Ulandes i Merka. Aparte di e Minister di Hustisia di Ulanda, a firma tambe Ministernan di Hustisia di Kòrsou, Aruba i St. Maarten.
Ku esaki ta logra mehorá i fortifiká mantenshon di e sistema di derecho den tantu e parti di Karibe di Reino Ulandes i tambe na Ulanda mes i koperashon ku Merka.
Meta prinsipal di e akuerdo ta enserá, ku tur e paisnan enbolbí ta komprometé nan mes den kombatí krímen i terorismo organisá ku ta krusa frontera.
Esaki no únikamente lokalmente sino tambe den region. Pa por logra enfrentá e situashon di krímen den nos paisnan i den nos region, tur pais enbolbí mester oumentá nan forsa den kombatimentu di krímen i terorismo.
Apertura di e asina yama, ‘Start Conferentie’ ku a tuma lugá awe mainta tabata na enkargo di Minister di Hustisia di Kòrsou, Mr. Nelson Navarro.
Minister Navarro den su diskurso a enfatisá e importansia pa stimulá aktividatnan konhunto i interkambio di informashon den área di investigashon kriminal i mantenshon di órden públiko i seguridat; alabes ta imperativo tambe pa kombatí terorismo en general, fortifiká e lucha kontra trafikashon di hende i kontra krímen ku ta keda desplegá via e sistema di Internet (e asina yama ‘Cyber Crime’).
Imperativo ta tambe pa hasi bon uso di sistemanan di training spesialisá, ku ta keda ofrese dor di partikularmente Merka, esaki siendo parti di e akuerdo di koperashon firma anteriormente.
E trainingnan aki ademas ta yuda den subi e nivel di integridat di nos forsanan uniformá, interkambio di eksperensia i muchu mas.
Na e konferensia a asistí, funshonarionan di Ministerio di Hustisia di tur e paisnan den Reino Ulandes, representante di Konsulado Merikano, representantenan di Ministerio Públiko di tur e paisnan, funshonarionan di kuerpo polisial (KPC), aduana (Customs), Kustwacht, Koninklijke Marine, RST i otronan ku ta laborá den e área di mantenshon di órden públiko i seguridat den tur e paisnan di Reino Ulandes.
Bron: Extra