WILLEMSTAD.- Minister di Salubridat Públiko, Medio Ambiente i Naturalesa Zita Jesus-Leito lo tuma karta den e asuntu tokante desaroyo di konstrukshon di hospital nobo.
Pero te ainda Jesus-Leito no a tuma desishon final kon ta bai sigui ku hospital. Manera ta konosí na komienso di e aña aki organisashon finansiero di kontrol SONA a splika ku organisashon di ehekushon Berenschot ya no ta forma parti di e proyekto mas. “SONA a splika ku na 2013 a kumbiní ku Berenschot pa kontra un porsentahe fiho (fixed fee) e kaba e proyekto di Hospital Nobo pa pueblo di Kòrsou pa promé di yanüari 2017. Sinembargo e hospital no ta kla ainda, i pa evitá gastunan adishonal i/òf claim sin ta na nodi, SONA a disidí pa e mes kontinuá ku e trabounan di ehekushon i pa manehá e kontrakt”, SONA a splika.
Esaki ta nifiká ku entrante promé di yanüari 2017 Berenschot no ta outorisá mas pa fungi komo organisashon di ehekushon pa SONA.
Un otro desaroyo ta ku eks-minister di Salubridat Victorina un mei aña pasá a duna órden pa traha un rapòrt tokante desaroyo di e konstrukshon. Kompania di abogasia FCW Legal a koordiná huntu ku e kompania di Bèlgika VK Architect Enginering un rapòrt tokante konstrukshon di e hospital. Minister Jesus-Leito a puntra dos luna pa bin ku klaridat kon por sigui ku konstrukshon di hospital nobo. Na e momentu aki SONA ta hasi su trabou. “Hospital ta den konstrukshon te ainda. Esaki ta positivo”, segun Jesus-Leito. Te awor e ta studiando tur posibilidatnan kon por sigui.
Bron: Extra