WILLEMSTAD.- Repúblika Bolivariano di Venezuela ta repudiá i protesta e desishon di Gobièrnu di Estádos Unídos di Norte Amérika ku a imponé sanshonnan kontra di e Hefe di Estado Venezolano, Nicolas Maduro Moros, ku ta un violashon grandi di e Derechi Internashonal i ta violá tambe su derechinan humano, konfigurando asina un akto inamistoso kontra di Venezuela.
Asina un komunikado ofisial di Konsulado di Venezuela establesé na Kòrsou ta bisa e siman aki. Tambe ta rechasá e deklarashonnan insolente i no na su lugá di e asesor di Seguridat Nashonal di Kas Blanku, H.R. Mc.Master.
Segun Konsulado, e sanshonnan aki ta konsistí di un vengansa kontra di Presidente Nicolas Maduro, pasobra el a yama un proseso elektoral di e magnitut mas grandi di último tempu na Venezuela, dor di a profundisá demokrasia i soberania di e pais mediante di aktivashon di e poder konstituyente original, ku ta un defensor di e dignidat di Amérika Latina i Karibe i dor di a bai rotundamente kontra di e supermasia blanku di e Presidensia Estadounidense i su rasismo di Ku Kux Klan.
E pueblo di Venezuela a duna un lès históriko di un héroe, determinashon i balentia, derotando e menasa i violensia ku a bin ta lanta kabes di parti di e kampo derechista di Venezuela, ku sosten di pafó, ku kier a stroba e trabounan ku mester a keda realisá ku e voto pa skohe un Konstituyente ku lo a habri kaminda pa un bida nashonal, mas mihó, diálogonan grandi i un mihó konosementu di e konstitushon i asina trese pas na un nashon independiente. Nos a skibi un página nobo di gloria den nos historia di libertat i outodeterminashon.
E sekshon imponé pa departamento di Tesoro di Estádos Unídos kontra di e Hefe di Estado i Gobièrnu di Venezuela ta konsistí di un gran falta di konosementu di e legalidat internashonal i ta pretendé di mina e soberania di Repúblika Bolivariano di Venezuela, awe ku práktikanan di intervenshon i destabilisashon di su gobernantenan mediante di promoshon di aktonan violento grave i ekstremo ku finnan polítiko.
Repúblika Bolivariano di Venezuela, ta manda palabranan di gradesimentu na e paisnan ku si a transmití nan apoyo i rekonosementu di e proseso elektoral konstituyente, ta rechasá kategorikamente e intentonan di algun Gobièrnu ku ta ninga di aseptá e resultado i ta bai tras di sanshonnan imperial, desafiando e boluntat soberano di e pueblo Venezolano i atendiendo sumisamente ku órdennan di paisnan djafó.
Repúblika Bolivariano di Venezuela ta eksihí rèspèt pa e patria di Bolivar i Chavez, na e tempu ku e ta reafirmá su kompromiso irenunsiabel ku e defensa di e balornan patriótiko di mas haltu, pa perseverá e futuro soberania di Venezuela.
Bron: Extra