WILLEMSTAD.- Segun eks Minister di Tráfiko, Transporte i Planifikashon Urbano, sra. Suzy Camelia-Römer, durante su periodo komo titular di VVRP el a haña no ménos ku 30 petishon di kontratistanan chikí pa nan tambe por haña partisipá den e konsepto di Public Private Partnership.
Den e periodo ei tabatin un proyekto ku el a kuminsá ku lo mester a krea 3.000 kavel di tereno pa repartí igualmente entre Fundashon Kas Popular, PPP i pa konstrukshon propio, i segun Camelia-Römer e ta spera ku e aktual minister di VVRP lo kontinuá ku e proyekto aki ya ku e ta algu bon, i kos bon ta importante pa kontinuá kuné.
E kontratistanan chikí tambe e hasi petishon pa nan haña kavelnan den kuadro di PPP. Den su kaso e no a mira motibu pa deskriminá e kontratistanan chikí. Esnan grandi kisas por tuma i konstruí riba 400 kavel, pero e chikí por ku apénas 10. I den kaso ku e konstruí e kasnan na drechi i kosnan kana sin problema, e lo por bolbe haña 10 kavel mas. E tambe tin ku biba komo kontratista chikí i no e grandinan so.
Segun Camelia-Römer, e no por komprondé dikon lo tin di bai hasi revishon pa wak si tin algu malu, sino ta para e proyekto, i si e ta bon lo kontinuá kuné. Gobernashon ta kontinuashon, si tin kosnan ku ta bon por sigui ku nan. E ta kere ku e kuestion di bai revisá ta sistemanan di kore kampaña barata. Dunamentu di kas ta un dje formanan aki. Ta kore entregá kasnan sin tene kuenta ku e balanse entre e hendenan ku ta haña kas. E no ta mira un pakiko un kontratista chikí mester sinta warda pa kosnan ser revisá.
Okupashon ilegal
Pa loke ta okupashon di terenonan den forma ilegal, segun sra. Camelia-Römer e tin di bisa ku e proyekto aki ta kanando na satisfakshon, pero e ta kere ku mester sòru si pa e tin su presupuesto. Por sierto, den su dokumento di traspaso el a menshoná esaki. E ta algu ku ta den man di Ministerio di Finansa pa revishon. E ta algu ku ta sumamente nesesario pasobra e ta un persona ku ta kere ku mester restablesé òrdu riba e tereno aki. No por sigui permití okupashon ilegal di tereno.
Bron: Extra
Hopi a ser hasí pa krea tereno pa konstrukshon di kas
WILLEMSTAD.- Suzy Camelia-Römer ta eks Minister enkargá ku e kartera di Tráfiko, Transporte i Planifikashon Urbano (VVRP), i ayera tardi durante un enkuentro ku prensa konvoká pa partido PIN el a duna un splikashon di e esfuersonan ku a ser hasí i te ainda ta ser hasí dor di Domeinbeheer i otro ministerionan pa saka i prepará terenonan pa konstrukshon di kas. El a duna di konosé entre otro ku durante un periodo a logra eliminá mas o ménos 2.500 hende for di e lista di espera. No a publiká esaki pa motibu ku tabata buska un fórmula pa e hendenan aki kitá for di e lista por ta informá. Por ehèmpel, si un persona tin un kas òf tereno kaba e no ta bini mas na remarke pa e ta riba e lista. Lo mester duna espasio i posibilidat tambe pa e grupo aki por bai den apelashon, pasobra kisas pa un òf otro motibu tin di nan lo por bini na remarke tòg.
Mas aleu segun Camelia-Römer, a papia tambe di preparashon di parselanan pa konstrukshon propio. Den esaki por pensa tambe riba e konsepto di Public Private Partnership (PPP). Ta algu ku a kuminsá kuné for di 1997, pasobra e tempu ei gobièrnu su situashon finansiero tabata delikado, no tabatin sèn. I e Bestuurscollege dje tempu ei a pensa pa di un manera kreativo tòg yega na kas pa pueblo i asina ofresé kas na esnan ku ta riba lista di espera. E tempu ei a yega na un fórmula i palabrashon ku kontratistanan kaminda gobièrnu ta pone terenonan disponibel, i e kontratista ta prepará e tereno, e ta traha e kaminda, e ta konstruí e kas, i finalmente gobièrnu ta traspasá e bibienda pa esun ku a kumpr’é. Gobièrnu ta keda enkargá ku e parti di iluminashon di kaya etc. Esei ta e konsepto di PPP, i na aña 2006 un konsultent a evaluá henter e konsepto aki i a yega na e konklushon ku e tipo di proyektonan aki ta yuda yena e bashí ku tabatin i tin den e merkado di kas.
Pero segun Camelia-Römer, den esun aña i mei ku e tabata minister el a traha riba un “crash program” ku e intenshon di yega na 3.000 kavel den kuater aña di tempu, di kual 1.000 lo a bai pa PPP, 1.000 pa Fundashon Kas Popular i 1.000 pa konstrukshon propio. Un proyekto manera esaki lo a kosta 65 mion florin, pero a manda e proyekto pa Ministerio di Finansa pa un evaluashon. A pidi konseho hurídiko tambe ya ku e kuestion di hasi kosnan grandi asina sin pidi konseho por hinka bo den problema serio.
Bron: Extra