WILLEMSTAD.- Awe lo kuminsá ku tratamentu di e kaso ku Kontrolaria General a bai den apelashon kontra e kompania di telekomunikashon, UTS. Manera ta konosí, na luna di aprel dje aña aki e dos partidonan a bai un disputa den korte i finalmente UTS a Sali vensedó.

T’asina ku tabatin un desishon di Parlamento ku ta instruí Kontrolaria pa hasi un ouditoria den UTS, ya ku tabatin sospecho ku e maneho diario ta laga di deseá i ku lo tin kosnan ku no por mira lus di dia.

Manera ta konosí, algun luna pasa Kontrolaria a bai korte ku UTS den un intento pa e por haña entrada den e kompania pa por hasi sierto investigashonnan. Kontrolaria mester a bai korte ya ku gerensia di e kompania a nenga entrada di Kontrolaria alegando ku e tin su propio akountent interno i eksterno. Pero Kontrolaria a basá su mes riba un desishon/moshon di Parlamento ku a instruí e entidat aki pa hasi un ouditoria den UTS, ya ku tin sospecho ku lo tin kosnan ta sosodiendo ku no por mira lus di dia. Pero finalmente Kontrolaria a bin pèrdè e kaso.

Pero Kontrolaria no a keda kontentu ku e veredikto i a disidí di bai den apelashon, ya ku tabatin indikashon ku tin hasimentu di wega. Tin abogado di Kontrolaria e tempu ei ku konsientemente a keda sin presentá pa e kaso, miéntras ku ora ku Kontrolaria a disidí di apelá e kaso, a surgi hopi lobimentu di forma masha diskreto pa Kontrolaria distansia numa dje kaso. Pero segun informantenan di EXTRA, den apelashon Kontrolaria lo bai aun mas leu, ya ku tin sospecho ku den periodo di kampaña pa elekshon tin mas kos straño a sosodé.

Tambe nos lektornan por kòrdá kon Kontrolaria tabata hopi rabiá ku su propio abogado. E malkontentu di Kontrolaria a keda manifestá i ekspresá den un karta ku por konsiderá komo un “brandbrief”, ku a bai tantu pa e abogado mes komo pa Minister di Asuntunan General. Kontrolaria ta haña ku e abogado tabata hopi negligente den e kaso aki pa kual tabatin tantu espektativa. Negligente pa motibu ku, no opstante el a prepará p’e kaso, tòg ora di presentá den korte el a bria pa su ousensia i laga un otro kolega abogado bai basha awa.

Kontrolaria a optá pa no hasi uso dje servisionan di e bufete di abogadonan aki, no opstante ku gobièrnu ta pagando nan un kompensashon fiho di 24 mil florin pa luna, ya ku e konfiansa no t’ei mas.

Pa e kaso di apelashon Kontrolaria a kontratá abogado Van Rijn di Ulanda kende lo ser asesorá pa mr. Berti Braam.

Bron: Extra