WILLEMSTAD.- E no tin nada kontra Guangdong Zhenrong Energy, e no tin motibu pa ta kontra nan tampoko, pero for di loke por a mira te ainda riba papel por konkluí ku e loke ke bai firma ku e grupo Chines aki no ta kumbiní Kòrsou den ningun sentido.
Si nos bai di akuerdo ku loke tin poné den e MOU i Heads of Agreement, Kòrsou lo bai arepentí di a regalá su patrimonio di mas importante dje forma aki. I su patrimonio di mas importante no ta e refineria, sino Bullenbaai i henter e kadena di energia i hafnan. Asina sra. mr. Marguérite Nahar a duna di konose na EXTRA den un reakshon den e fin di siman ku a pasa.
Sra. Nahar a splika ku, pa hopi tempu e tabata konsehero hurídiko eksterno di Refineria di Kòrsou. Por sierto, den preparashonnan pa a stipulá un MOU ku PDVSA e tabata envolví i a duna su konseho e tempu ei. E tabatin tur dokumentashon na su disposishon. Pero el a keda sorprendí ora ku el a tuma nota di e movidanan di e tim multidisiplinario (MDTP). El a keda sorprendí ora ku el a lesa den korant ku a firma un akuerdo ku Guangdong Zhenrong. Promé ku esei no tabatin ningun palabra menshoná di e grupo Chines. E no a risibí ningun dokumento pa e por a studia e parti hurídiko manera semper el a hasi.
Segun sra. Nahar, den promé instante el a pensa ku lo ta un ‘stunt’ polítiko komo ku nos tabata den periodo di kampaña. Pero ora ku a firma e MOU, el a haña konfirmashon ku tin wega ta ser hungá.
Pero di otro fuentenan el a risibí e MOU tòg, i ora el a lesa loke tin aden su kurpa a kue rel. No por ta posibel! Dje forma aki simplemente lo duna hafnan i e kadena di energia di regalo na e grupo Chines. Pero sin ku gerensia di RdK a pidié el a sinti su mes obligá di traha un memo, pues el a opta pa duna su opinion i konseho tòg. Pero komo ku su opinion no tabata den konkordansia ni tabata sigui liñanan di MDTP, gerensia di RdK a terminá e relashon di trabou kuné.
Segun sra. Nahar, no ta konsehabel pa apliká e konsepto di “Build Own & Operate”, pa motibu ku esun ku konstruí ta bira doño i pa un periodo hopi largu. Direktor di RdK sa debidamente ku e akuerdo aki lo nifiká ku ta regalá fuentenan importante di entrada di nos isla.
E ta hopi floho di kere ku un CPA ku ta manehá wafnan lo bai di akuerdo; pa no papia mes di Aqualectra i Curoil. Kon por ta ku ke sera un dil unda ta pone tur webu den e mesun makutu. Mester separá Isla for di Bullenbaai. Loke e Chinesnan ke ta Bullenbaai, ku bista riba aktividatnan di trasbordo den kuadro di nos posishon geopolitiko.
Es mas, tin plannan konkreto pa desaroyá e aria patras di Bullenbaai, ku un diversifikashon kompleto di aktividatnan.
Referiendo na e supuesto invershonnan di $10 miar, segun sra. Nahar esaki tabata un bon bakoba pa kue makaku, pasobra den 40 aña di tempu Guangdong lo no logra tantu ganashi pa saka su plaka bek. Ademas manera kosnan ta kanando den e mundu petrolero internashonal, uso di kombustibel fosil ta bahando, pasobra ta usando mas i mas energia duradero. Por sierto, China i hopi otro pais ta firmante dje Akuerdo riba Kambio di Klima, pues nan sa ku nan no tin e desaroyonan den man.
Pues segun sa. Nahar, e mihó kos ku por sosodé e mundu polítiko ta di pone e negosiashonnan ku Guangdong Zhenrong ‘on hold’ i laga e próksimo gobièrnu studia e dokumentonan aki pasobra Kòrsou lo bai arepentí, si tin di firma e loke tin aktualmente riba mesa.
Bron: Extra
Naschrift KKC:
MFK awe ta bin ku moshon ku Guangdong Zhenrong
WILLEMSTAD,- Segun lider di partido MFK Gerrit Schotte, ‘ta tristu pa Pueblo di Kòrsou tin ku bolbe tuma nota kon un gobièrnu demisionario, por konta ku sosten di 11 parlamentario, ku ta MAN (4), PAR (3), PNP (2) i PS (2), pa hipoteká pueblo su patrimonionan pa e próksimo 40 añanan.’
Schotte ta reakshoná riba a dos akuerdo ku a keda firma entre Kòrsou i kompania chines Guangdong Zhenrong. Awe parlamento di Kòrsou ta deliberá tokante e akuerdonan ku a keda firmá.
Frakshon di MFK ta eksigí di Gobièrnu pa informá e partido ‘ta kua Due Diligence nan RDK i MDPT tim a hasi pa yega na Guandong Zhenrong i China Zhenrong Holding? I tambe kua lo sigui hasi den e proseso di negoshashon?’
‘Due diligence’ ta nifiká ku promé ku firmamentu di un kontrakt ta investigá e kompania konserní. E término ‘due diligence’ ta nifiká ‘koutela eksihí’ òf kuidadó rasonabel. Esaki ta un término hopi komun I ta kustumber den mundu di negoshi, segun Gerrit Schotte. E ke sa si gobièrnu di Kòrsou a investigá Guandong Zhenrong promé ku firma e akuerdonan.
MFK ta splika ku nan lo presentá un moshon durante e reunion di awe ‘kaminda nos lo sa ken ta duna aprobashon pa mara nos pais na dilnan di 40 aña, ku lo por buta nos seguridat nashonal i tambe seguridat energétiko pa e próksimo siglo na peliger, sin ku pueblo i pueblo su representantenan por sinti nan mes kómodo ku e dilnan aki.’
Segun Schotte e realidat ta ku a firma un Memorandum di Entendimentu (MOU) i despues tambe un Heads of Agreement ku e grupo chines Guangdong Zhenrong, i te ainda ningun sindikato den Refineria Isla no sa kiko ta e kontenido di e akuerdonan ku ta firmando, ‘miéntras ku Parlamento den su gran mayoria tampoko ta na altura.’
Bron: Extra