WILLEMSTAD — Informashonnan ku EXTRA a haña ta indiká ku últimamente a konstatá diferente kaso di sífilis atrobe. “Ta algu ku masha tempu nos no a mira”, asina un médiko ku nos a konsultá riba e tema aki ta bisa.
Den pasado tabata registrá kasonan di sífilis ku frekuensia. Ta parse ku e ta dominá pero awor aki poko poko e ta lantando kabes atrobe. Sífilis ta un malu venériko ku sin tratamentu por ta ekstremadamente peligroso.
Por sierto ku EXTRA a haña informashon ku e kantidat di kaso di malu venériko en general ta oumentando atrobe. Un di e faktornan ta hasimentu di sèks sin protekshon. Di un manera òf otro no ta logrando di atvertí nos komunidat, prinsipalmente hóbennan riba e riesgonan ku nan ta koriendo no solamente pa malunan venériko ku por trata pero pa esnan ku ta masha peligroso i por ta hasta fatal manera HIV.
Prinsipalmente den sierto temporadanan di aña ta nota ku e kantidat di kaso ta oumentá i un ta pega otro. Ta referí aki na e periodo di karnaval i tambe kambio di aña. E libertat ku ta den sèks awor aki i kambio di partner konstante tin su problemanan serio. Ademas prostitushon di kaya tambe ta oumentando mas i mas despues ku e tabata dominá pa basta tempu. Un di e faktornan ta prostitushon kresiente for di Venezuela ku ta serando wowo pe te ku awor aki. Esmas, ta parse ku no por hasi nada kontra dje komo ku esnan ku ta práktika e fishi aki ta drenta legalmente nos pais.
Resientemente eks-minister Nelson Navarro a bisa ku enbèrdat venezolanonan en general mester mustra ku nan tin mil dòler pa nan keda Kòrsou durante un siman. Pero esei no ta pa venezolanonan so pero pa tur nashonalidat. Un hende ku bin Kòrsou mester demostrá ku e tin e suma aki pa keda riba bos isla, asina el a bisa relashoná ku krítikanan ku tin riba e asuntu aki. Por sierto e minister saliente ta ninga di generalisá entrada di muhénan di e pais bisiña ku prostitushon.
Pa loke ta trata e aspekto di malu venériko ta sigur ku outoridatnan mester bai hasi algu promé ku e sali totalmente for di man. Manera indiká sífilis no ta un kos di hasi wega kuné. Sífilis ta presentá den diferente fase i sin tratamentu e por kondusí na kondishonnan serio pa e tur hende i den kaso ekstremo e por ta fatal. Un aspekto importante ta pa hende ku sífilis no sigui plama e enfermedat pa otro partnernan kedando sin usa e protekshonnan nesesario. Sífilis por keda hopi tempu skondé i esei tambe riba su mes ta un problema serio komo ku tin hende ku no sa mes ku nan tin e kondishon aki i ta te ora e promé síntoma presentá nan ta bai hasi un chekeo médiko.
Bron: Extra