WILLEMSTAD.- Kòrsou ta un pais di oportunidat i nos tur por benefisiá di esaki. Kòrsou ta bendishoná ku laman i esaki ta un aktor importante ku lo por benefisiá e lugá aki grandemente.

Den kuadro di esaki a firma un akuerdo entre gobièrnu di Kòrsou, Curaçao Marine Research Centre i Carmabi pa desaroyá Kòrsou komo lider regional den siensia di naturalesa. Durante un enkuentro ku prensa konvoká pa gobièrnu, Minister di Salubridat, Medioambiente i Naturalesa, sra. Zita Jesus-Leito, a splika ku riba tereno sientífiko Marino nos tin hopi potensial. Ta bai invertí den e proyekto, pero tambe den un trayekto di konsientifisashon, informashon pero tambe pa enforsá leinan pa evitá ku ta hasi daño na nos parke di koral i e mundu marítimo en general.

Segun e minister di parti di su ministerio tin hopi esfuerso ta ser hasi. Tin sientífikonan di eksterior ku ta bini regularmente aki pa investigá, pero lokalmente tambe tin hendenan ku ta dediká nan tempu spesífiko riba tereno di naturalesa. Es mas, komo parti di e proyekto aki a nombrá kaba un kordinadó ku ta bai tin bista riba e desaroyonan.

Sr. Paul Stokkerman di Carmabi a splika ku nan tin un departamento di edukashon ku ta hasi hopi na konsientisashon i informashon. Por bisa ku defakto e ta separá den dos programa, di kual unu ta enfoká riba tera i otro ku ta enfoká riba laman. Ta hasi hopi na konsientisashon, i prueba di esaki ta ku tur aña Carmabi ta risibí bishita di 13 mil mucha di skol pa hasi rekorido den parkenan i arianan natural. Pero algu mas ku un aña pasá a kuminsá enfoká mas tantu riba e parti Marino. Den e situashon aki tur siman tin un skol ku ta bishitá Carmabi pa haña informashon riba bida di laman, nan ta hasi rekorido den e museo nobo di Carmabi. Ta di komprondé ku ta difísil pa bai den laman ku henter un skol, ta p’esei a disidí pa trese e bida di laman riba tera pa hende komprondé mas mihó.

Di su parti sr. Dutch Schrier di CMRC tambe a splika ku regularmente tin bishita di skolnan na Seaquarium i ku dje forma aki ta duna informashon. Segun sr. Schrier, el a bisa hopi biaha ku Kòrsou ta un pais di oportunidat i el a haña e oportunidat di hasi hopi pa e pais aki. E ta kontentu pa motibu ku den kualke pais grandi esaki lo no tabata posibel fásilmente.

Bron: Extra

$430 mion ta lora na Kòrsou den turismo marítimo

WILLEMSTAD.- E echo ku gobièrnu a disidí di depositá su konfiansa den Carmabi ta un indikashon ku ta duna no solamente Carmabi pero Kòrsou un chèns di bai dilanti riba tereno di investigashonnan sientífiko. Esei na opinion sr.

Sr. Paul Stokkerman di Carmabi na okashon di firmamentu di un akuerdo entre gobièrnu Carmabi i CMRC di Dutch Schrier pa Kòrsou por bira lider den investigashonnan sientífiko regional. Sr. Stokkerman a splika ku e proyekto aki ta unu di siensia, pero e efekto di e proyekto aki ta ekonómiko, den e sentido ku sientífikonan lo bai investigá pa trata di deskubrí algu ku por yuda e mundu medisinal, pero di otro banda e komunidat a haña benefisio finansiero fo’i dje pa motibu di e derechonan ku Kòrsou a bai haña.

Tabata algun aña pasá ku Kòrsou a risibí bishita di representantenan di e fundashon Waitt ku tambe ta hasi investigashonnan similar den awanan i tambe pa kalkulá kiko ta e efekto ekonómiko di e ref di koral. Den e investigashon ei a bin Sali na kla ku e loke Kòrsou ta benefisiá di turismo di buseo i otro aktividatnan ta na rason di $430 mion pa aña, i esei kon ku bai bin ta hopi plaka.

Segun sr. Stokkerman, mester realisá ku tur aña nos ref di koral ta generá plaka. E ta algu ku bou di laman, nos no ta mir’e, pero e ta traha si pa nos.

Mas aleu Carmabi ta risibí anualmente mas ku 200 studiante sientífiko, i durante nan estadia di algun luna nan ta laga atras un kantidat kalkulá na 1 mion florin pa aña. Esei ta e sektor di turismo sientífiko.

Sr. Stokkerman a splika tambe ku e sektor aki ta hopi interesante. Tin un tratado internashonal di Nagoya i e protokòl aki ta bisa ku si un kompania farmaseutiko grandi haña komponentenan den ref di koral ku por ser usa pa finnan medisinal, ku un parti di e loke e remedi aki generá tin di bai pa e pais di orígen. Pues esaki ta bira manera e “petroli” di region di Karibe.

Pero si konta tur e benefisionan ekonómiko, pues tantu loke Waitt Foundation a kalkulá (430 mion), ku e 1 mion ku sientífikonan ta gasta aki, huntu ku un posibel entrada for di e mundu farmaseutiko, lo por pone un bon fundeshi pa un sektor den ekonomia ku lo por bira hopi eksitoso.

Bron: Extra

Lo por tin deskubrimentu na Kòrsou pa yuda mundu medisinal

WILLEMSTAD.- Investigashonnan i deskubrimentunan den awanan di Kòrsou lo por yuda e mundu medisinal, i esei na su turno lo por yuda Kòrsou ekonómikamente. Imposibel e no ta pasobra ya a deskubrí diferente espesie di piska ku niun kaminda na mundu no tabata konosí. Tin otro organismonan den nos awanan ku lo por kontené supstansianan pa yuda den kura di kualke malesa. Esei por a komprondé for di presentashon di e direktor di Sentro di Investigashon Marítimo di Kòrsou, sr. Dutch Schrier. Sr. Schrier ta bon konosí komo persona tras di henter e desaroyo na Bapor Kibrá i Seaquarium, i awor na okashon di firmamentu di un akuerdo su sentro di investigashon huntu ku Carmabi el a duna di konosé di ta kontentu di por hasi algu awor huntu ku gobièrnu.

Un proyekto manera esaki na su opinion realmente lo por pone Kòrsou riba e mapa mundial pa loke ta investigashonnan sientífiko. No tin muchu investigashon mas na mundu unda por bisa ku niun hende no a hasi nada riba e tereno ei ainda. Pero aki na Kòrsou esei lo por ta e kaso. Pasobra ora ku e bai komo 900 pia bou di laman pa hasi investigashon, ta kamindanan ku niun hende no a bai nunka i aki tin sitionan pa eksplorá. Nos lo por deskubrí organismonan ku nunka niun hende a yega di mira na mundu.

Segun Schrier, prueba di esaki ta por ehèmpel ku den awanan di Kòrsou so a deskubrí komo 26 espesie di piská ku tabata deskonosí. A deskubrí un kantidat grandi di koral ku no ta konosí ainda niun kaminda na mundu. For di e koral (spounge) nan aki ta deskubriendo elementonan ku lo por ta di uso i importansia pa yuda den kura di kualke malesa. Asina algun aña pasa a deskubrí elementonan den un koral ku nan ta pensa ku e lo por yuda den kura di Malaria.

Por sierto, tin hendenan manera Bill Gates ku ta dispuesto pa invertí plaka den investigashon ku por kondusí na kombatimentu di malesanan pa kual te ainda no tin remedi. Asina pues aki na Kòrsou tambe nos lo por tin e suerte di topa ku kualke espesie ku por ta un primisia. I den kaso ku Kòrsou tin e primisia ei nos lo por reklamá e derecho di propiedat i konsekuentemente nos pais lo tin benefisio na momentu ku kualke kompania farmaseutiko ke optené e lisensia ei. Nos lo tin benefisio ekonómiko.

Segun sr. Schrier, aktividatnan di investigashon sientífiko tin nan riesgo i no ta tur hende òf kompania ta dispuesto pa hinka plaka aden.

Bron: Extra