Extra | Kòrsou tin e potensial pa bira un hub logístiko pa karga

Segun Eugene Rhuggenaath | Extra

WILLEMSTAD.- Kòrsou tin e potensial pa por bira un hub logístiko pa aktividatnan di karga marítimo i aéreo. I den kuadro di esei riba enkargo di gobièrnu di Kòrsou lo bai start ku un estudio pa investigá e posibilidatnan pa nos sektor di transporte aéreo i marítimo ofresé nan servisionan den region, Sur-Amerika i Europa.

Pa ofisialisá esaki a tuma lugá ayera mainta firmamentu di un kontrakt entre Stichting Ontwikkeling Projecten Logistieke Sector (SLS) i Maritime & Transport Business Solutions pa por hasi e estudio. Na e okashon aki Minister di Desaroyo Ekonómiko, sr. Eugene Rhuggenaath, a presensiá firmamentu di un akuerdo pa hasi un investigashon pa por konkretisá e idea ei.

Segun sr. Rhuggenaath, esnan ku konosé su ministerio sa tambe ku e tin un Plan Nashonal di Desaroyo, i komo minister semper e tabatin e ambishon pa hasi algu grandi. Nos tin e potensial aki na Kòrsou pa yega na un hub logístiko integrá kombinando nos tráfiko marítimo, tráfiko aéreo i fasilidatnan di karga.

Mas aleu el a splika ku den un kombersashon ku e tabatin resientemente ku e organisashon di Frezacur i tambe otro partnernan den e industria ku ta mira e desaroyonan pero tambe e defisiensianan, masha lihé el a tuma nota ku lo mester hasi un estudio profundo pa wak kon pa organisá tráfiko marítimo i tambe di kargo pa i for di Kòrsou. Ora ku el a papia ku miembronan di Frezacur i tambe algun empresario ku tin nan negoshi i ofisina den Zona Liber, nan a splika ku ketu bai nan ta konfrontá difikultat pa eksportá nan produktonan for di Kòrsou. E mesun kos ta konta pa e empresarionan hóben ku ta formando parti di nos ekonomia digital. Nan tambe ta konfrontá retonan pa por eksportá nan produktonan for di Kòrsou pa den region.

Basá riba esaki den su ministerio el a tuma e desishon ya ku ta mira e nesesidat pa hasi mas investigashon pa sa kon leu Kòrsou lo por profilá su mes komo un hub logístiko tantu pa aktividatnan di karga marítimo komo aéreo. Djis despues di esei a deliberá riba esaki ku diferente partner den ekonomia manera e.o. Kámara di Komersio, ku tambe a mustra e nesesidat pa hasi un investigashon similar.

Bron: Extra

Jonckheer: Kòrsou por bira un hub logístiko manera Singapore | Extra

WILLEMSTAD.- Pa hopi aña kaba komersio ta papiando di kombertí Kòrsou den un hub logístiko. Dikon? E motibu ta masha fásil. Primeramente pasobra nos ta parti di Reino Ulandes. Na di dos lugá nos tin hafnan liber, nos tin un bon infrastruktura, i nos ta kla pa por kompetí riba e tereno aki den region. Asina sr. Billy Jonckheer, presidente di Kámara di Komersio, a trese dilanti na okashon di firmamentu di un kontrakt entre Stichting Ontwikkeling Projecten Logistieke Sector (SLS) i Maritime & Transport Business Solutions pa hasi un estudio pa por desaroyá e potensial di Kòrsou komo hub logístiko.

Segun sr. Jonckheer, semper e tin di kompará Kòrsou ku un pais manera Singapore. Ta un pais na e tamaño di Kòrsou. I den e mundu di awendia e ta e hub di Asia. E ta duna kompetensia kontra paisnan grandi manera Hongkong, Taiwan i Hapon. Ta un isla chikí di e tamaño di Kòrsou ku un tempu a bira e hub logístiko number unu na mundu. Pues nos lo tin di traha pa bai den e direkshon ei. I e motibu dikon Kámara di Komersio tambe ta para tras di e estudio aki ta pasobra e ta kere ku Kòrsou ta e sitio pa hasi e tipo di negoshi aki.

Pa medio di e aktividatnan aki lo por demostrá dikon Kòrsou ta e hub ku tur hende lo mester tene kuenta kuné. E kompetidornan prinsipal den region lo ta Kingston, Jamaica, i Cartagena, Colombia, segun Jonckheer pero e ta kere ku Kòrsou lo por tin mas di ofresé ku e dos paisnan aki. Kòrsou lo por ta mas ku simplemente ser un hub di trasbordo. Kòrsou lo por bira un showcase pa paisnan grandi manera China, i paisnan ku ke eksportá pa Sur-Amerika.

Tin hopi hende ku lo pensa ku Kòrsou lo no por yega asina leu nunka. Pero e ta sigur ku nos por, i e ta spera ku e estudio ku SLS i MTBS lo bai hasi lo demostrá loke Kámara di Komersio a bin ta bisa pa hopi aña. E posibilidatnan tei, i nos mester bai pe!

Segun Jonckheer, esaki ta tambe un bon ehèmpel di Public Private Partnership (PPP). Ta kaminda sektor priva i gobièrnu por bini huntu pa un kousa komun i traha pa yega ei tambe. I den e kaso aki ta pa hasi di Kòrsou un hub logístiko. Esaki ta e manera pa sigui den futuro tambe komo pais. Nos tin un ekonomia global i ta tempu pa start ku e proyektonan. I den esei ta importante pa sektornan privá i gubernamental por traha huntu.

Bron: Extra

CPA kontentu ku pasonan konkreto pa yega na hub logístiko

De Castro: CPA kontentu ku pasonan konkreto pa yega na hub logístiko | Extra

WILLEMSTAD.- Ayera mainta a tuma lugá otro paso importante di e Ministerio di Desaroyo Ekonómiko pa por stimulá ekonomia di Kòrsou. Ku e vishon pa por hasi di Kòrsou un hub logístiko pa karga marítimo i aéreo, a firma un akuerdo ku e entidatnan Stichting Ontwikkeling Projecten Logistieke Sector i tambe Maritime & Transport Business Solutions pa hasi un investigashon riba e potensial di Kòrsou pa bira un hub logístiko pa region, Sur i Latino-Amerika.

Di su parti sr. Humberto de Castro, direktor di CPA, a trese dilanti ku pa hopi tempu tin diskushonnan ta ser hibá pa hasi di Kòrsou un hub logístiko. Pues e ta hopi kontentu ku tin pasonan mas konkreto a ser tumá den e direkshon ei i ku Minister di Desaroyo Ekonómiko a tuma e inisiativa pa awor si laga hasi un estudio, un análisis, un investigashon riba no solamente e posibilidatnan pa trasbordo di karga marítimo, sino henter e sektor mes, inkluyendo e parti di karga aéreo.

Segun de Castro, e tin eksperensia kaba ku e kompania Maritime & Transport Business Solutions ku ta esun ku konhuntamente ku Stichting Ontwikkeling Projecten Logistieke Sector ta hasi hasi e estudio. MTBS ta e kompania ku a desaroyá i diseñá henter e polítika di den haf, pues e ta kustumbrá kaba ku nan profeshonalismo. I e sa tambe ku nan estudionan semper ta finalisá mustrando riba bentahanan spesífiko ku nos tin. Pues e ta spera riba e oportunidatnan spesífiko ku keda identifiká.

Bron: Extra

Tur aktor riba tereno logístiko ta riba mesun liña

Stichting Ontwikkeling Projecten Logistieke Sector (SLS) i Martitime & Transport Business Solutions

WILLEMSTAD.- Tur partner den komersio ta riba e mesun liña, esta ku lo tin di hasi un estudio pa finalmente por kombertí Kòrsou den un hub logístiko pa loke ta aktividatnan di karga aéreo i marítimo. Esei di akuerdo ku Minister di Desaroyo Ekonómiko, sr. Eugene Rhuggenaath, na okashon di firmamentu di un akuerdo entre Stichting Ontwikkeling Projecten Logistieke Sector (SLS) i Martitime & Transport Business Solutions.

Segun e minister, el a hiba kombersashon ku e diferente aktornan den e sektor aki, i e por bisa ku e sektor di karga tambe tabata riba e mesun liña por bisa, i asina a disidí di uni forsa i aserka e e organisashon di Stichting Ontwikkeling Projecten Logistieke Sector (SLS) ku e petishon pa hasi e estudio i bini ku insentivonan pa por desaroyá un hub logístiko. E intenshon ta pa presentá un proyekto, a base di un investigashon i pa buska e partnernan korekto pa asina yuda konstruí esaki. A base di e evidensia i análisisnan hasí lo por yega na kosnan konkreto. Ku esaki den man lo por aserká partnernan logístiko na mundu pa yuda nos desaroyá nos potensial pa bira un hub logístiko den e region aki.

Segun sr. Rhuggenaath e ta kontentu di por haña mas informashon riba e partikularidat aki despues di un investigashon importante. Segun e minister, e ta spera ku e estudio i pasonan aki lo sigui konta ku sosten di esnan den komersio, partikularmente esnan den e sektornan di karga aéreo i marítimo.

No lubidá ku tin un konseshon nobo den haf, loke ta habri oportunidat pa mas kompania por invertí i duna servisio den hafnan aktual i den futuro. Ademas tin desaroyonan interesante na Bullenbaai tambe. Pues a base di e plan nashonal por mira ku tin potensial den e sektor logístiko i marítimo. Tur esaki lo por krea mas trabou, mas entrada i finalmente un mihó bida pa nos hendenan. Den e mesun rosea el a bisa di ta spera ku kualke gobièrnu ku sigui lo sigui sostené e pasonan aki. No tin duda ku ta trata aki di un proyekto masha importante pa Kòrsou. Ta solamente huntu lo por traha na e ful potensial di un hub logístiko pa Kòrsou.

Bron: Extra

 

Pa bira hub logístiko no ta papia di “problema” sino di “solushon”

Overeenkomst Stichting Ontwikkeling Projecten Logistieke Sector (SLS), KvK, MEO en Maritime & Transport Business Solutions (MTBS) | Extra

WILLEMSTAD.- Ora ku Maritime & Transport Business Solutions ta bai hasi su investigashon riba e posibilidat di Kòrsou komo hub logístiko, e palabra “problema” lo no ta riba su lista sin e palabra “solushon”. Den e tipo di kasonan aki ta prohibí pa papia di problema sino buska solushon. Asina e direktor di MTBS, sr. Patrick Uyttendaele, a trese dilanti ayera na okashon di firmamentu di un kontrakt entre Stichting Ontwikkeling Projecten Logistieke Sector (SLS) i MTBS pa hasi e estudio ariba menshoná. Segun sr. Uyttendaele, den e deliberashonnan ku el a hiba riba e tópiko di kombertí Kòrsou den un hub logístiko, el a sinti ku tin hopi entusiasmo bou di e aktornan. I esei na su turno ta duna e aserkamentu un balor agregá. Nos tur mester bai pa buska solushon.

E aserkamentu ku su kompania lo tin ta masha pragmátiko, pasobra na final di dia lo tin di hasi algu ku resultado di e investigashon aki. I e resultado dje investigashon lo tin di ser ehekutá dor di tur hende. Kada ken lo tin nan responsabilidat ora di bai implementá e proyekto. Pero e lo por duna sierto direkshon pa pensa ariba. A base di su eksperensia e sa dje diferensianan entre un isla i un pais grandi, e ta komprondé kosnan hopi bon. Pero no solamente e ta komprondé esaki, sino ku e ta aseptá e diferensianan. E sa ku tin hopi kompetensia riba merkado.

Segun Uyttendaele, un dje puntonan prinsipal ku mester konsentrá masha bon riba dje ta e aspekto di kompetensia. Nos tin un aeropuerto i nos tin haf. Komo hub logístiko lo bai tin kompetensia entre nan dos. Banda di esei tin kompetensia eksterno. I si tin kompetensia eksterno, bo mester evitá di tin kompetensia interno. Loke mester hasi ta di buska un solushon pa esaki. E no ta aserká e aspekto aki komo un problema, sino ku tin di buska un solushon pe. Si nos ke bai dilanti, no aserka e kosnan i wak e problema, sino buska e solushon.

El a rekonosé ku e parti di logístika ta algu ku por ta kompliká. Pero e lo bai trata di duna kontesta na dos pregunta. Kon lo por ta mas mihó pa fasilitá importashon, eksportashon i trasbordo di produktonan pa i for di nos isla. Kòrsou mester ta sigur ku e ta mantené e volúmennan ku e tin, i asta wak kon por oumentá e fluho di produkto. Esei ta loke e ta yama e aserkamentu “Delta”.

Tin e industria di turismo i tin esun di aeropuerto. Awor ta bai buska un forma nobo di industria. Loke mester wak ta kon por sòru pa trese karga aki na Kòrsou i dun’e balor agregá. I den e parti aki ta bini e parti di kompetensia. Pero atrobe, e no ta bai wak e problema sino wak e solushon. Ta p’esei ta eksistí e konsepto di Public Private Partnership, i nunka mester balotá e aserkamentu ei.

Pa loke ta e estudio mes, segun sr. Uyttendaele, despues di algun luna lo duna puntonan ku ta mustra e lus ku tin na horizonte. Pero riba esei lo no ta problema pasobra tur hende ta riba e mesun liña kaba i ta trahando ku e mesun meta.

Bron: Extra

5 Reacties op “Extra | Kòrsou tin e potensial pa bira un hub logístiko pa karga

  1. Dreifi sin heful

    Wat zijn ze hier nou aan het ondertekenen? Het krijgen van miljoenen voor dit project? Of wat?

  2. Als het maar geen hub wordt voor het exporteren of ontvangen van drugs van en of naar het buitenland, zoals de havens van Antwerpen en Rottredam

  3. Abraham Mossel

    Een normale inversteerder komt alleen nog naar curacrim als het eerst ontroleerd wordt plat/af gebrand, net zoals men doet met een dooie “heide” waar niks meer op groeid. Na de brand nog ff goed controleren dat er geen onkruid is blijven staan ” in de vorm van politici ” dan inzaaien met fris gewas en gecontroleerd op laten bloeien. Zo gauw er loser plantje gaan groeien, direct de kop af snoeien en de wortel met zoutzuur vernietigen.

  4. Was het niet deze groep die met een havenbeleid kwam om KTK los te koppelen, CPS een nieuwe concessie te geven en CPA de eigenaar van alle haventerreinen te maken? Ik heb mijn vraagtekens.

  5. Een normale investeerder gaat niet meer naar Curacao

Geef een reactie

Het e-mailadres wordt niet gepubliceerd. Vereiste velden zijn gemarkeerd met *