Extra | Krannan di kònteiner por kibra kualke momentu

Container haven | Foto CPA

WILLEMSTAD.- VBC, e asosashon di empresarionan di Kòrsou ta denunsia estado tékniko di krannan, kual nan ta konsiderá komo inkonfiabel.

VBC ta bisa ku e estado den kual e krannan di kònteiner di nos haf ta i perspektiva no muchu kla ku pronto lo bini un solushon pa e problemátika aki, ta duna rason pa masha hopi preokupashon.

Mester kualifiká e estado tékniko di e krannan komo inkonfiabel. Nan por kibra kualke momentu ku tur e konsekuensia pa nos ekonomia ku ta dependé di importashon di produkto. E daño ekonómiko lo ta grandi si e krannan no funshoná mas i e desaroyo aki tambe lo tin konsekuensianan finansiero i sosial negativo.

Riba tereno polítiko ta reina falta di desishon i por lo pronto no tin indikashon ku ta bai bin kambio den esaki. T’asina si ku Konseho di Minister a bai di akuerdo ku un proposishon, pero den Parlamento presidente di frakshon di un di e partidonan di koalishon ya a indiká ku e no ta di akuerdo ku esaki.

VBC ta bisa ku Kòrsou ta bayendo den e situashon ku lo no tin krannan (Gantry) funshonando den haf.

Barkunan ku mester deskargá merkansia lo evitá di drenta aki i ta baha nan karga ku ta destiná pa e isla na otro lugánan. Importadornan lo tin ku hasi èkstra gastu pa trese e kònteinernan aki Kòrsou. Pa e konsumidó esaki ta nifiká (hopi) tardansa i preis mas altu. Pa e isla esaki lo resultá den un daño konsiderabel di su imágen.

Asosiashon di Komèrsio i Industria di Kòrsou (VBC) ta ripití ku outoridatnan di haf, den e kaso aki gobièrnu lo ta responsabel pa e èkstra gastu ku esaki ta trese kuné dor di e aktuashon defisiente i total negligensia. Importadornan ta konsiderando pa tuma pasonan hurídiko pa rekobrá e gastunan adishonal, respektivamente daño sufri, VBC ta sigui bisa.

Pa evitá e desaroyonan indeseá aki ta bai un biaha mas un yamamentu urgente na partidonan responsabel, en partikular mandatario- i parlamentarionan pa tuma desishon mas pronto posibel pa atkirí i renobá e krannan Gantry den haf. Ku karta fechá 4 ougùstùs 2015 VBC ya a manda e mensahe aki pa gobièrnu. Te na e momentu aki no a bini ningun reakshon di parti di gobièrnu. (Foto CPA)

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *