Extra | Akuerdo pa proyekto importante pa Kòrsou

Goedkeuring voor Multi Commodity Center Worldwide Free Trade Zone op Hato

WILLEMSTAD.- Awe ta firma un akuerdo importante pa proyekto pa Kòrsou. Ta trata di e akuerdo kaminda lo firma e lease/hür (lease agreement) entre Curaçao Aiport Holding (CAH) i C-MCC Development Group, LLC (C-MCC).

E akuerdo di ‘lease’ ta un momentu históriko ku ta marka komienso di un proyekto importante pa Kòrsou.

CAH lo pone un tereno di aproksimadamente 70.2 hèktar disponibel pa e proyekto i Curaçao Airport Partners a bai di akuerdo pa pone 12.3 hèktar disponibel, kual total ta forma un área di 82.5 hèktar. Esaki ta hasi e desaroyo di Curaçao – Multi Commodity Center Worldwide Zona Franka posibel.

E akuerdo lo wòrdu firmá den presensia di Minister di Desaroyo Ekonómiko Señor Eugene Rhuggenaath. Otro ‘stakeholders’nan ku tambe lo ta presente durante e seremonia ofisial aki lo ta Dutch Caribbean Securities Exchange (DCSX), UTS, KPMG, bufete di abogado VanEps Kunneman VanDoorne, Curinde, Blue Nap Americas, International Preparedness Associates, Studio Acht i SMART States.

C-MCC Worldwide ta un kompania establesé na Estádos Unídos i e grupo aki tin hopi eksperensia den desaroyo di “real estate”, teknologia i tambe “commodity trading” riba un nivel internashonal. C-MCC Worldwide lo ta basá riba e modelo i struktura di Dubai Multi Commodity Center (DMCC) i Dubai International Finance Center (DIFC), ku a prueba di ta sumamente eksitoso den e último dékada.

C-MCC Worldwide lo usa Kòrsou komo su base prinsipal den e hemisferio oksidental pa fungi komo un hub kaminda lo konektá Americas i Oropa.

C-MCC lo implementá e plan di komersio di ámbos DMCC i DIFC aki na Kòrsou, hasiendo uso di mesun strategia ku a hasi DMCC sumamente eksitoso aya na Dubai. C-MCC lo fasilitá hasimentu di negoshi físikamente i elektrónikamente den oro i metalnan presioso, djamanta i piedranan presioso i tambe otro materia prima manera kòfi, yerba, produktonan petrolero i hopi mas. E inisiativa aki en konekshon ku nos haf natural i nos lokashon sentral lo yuda desaroyá Kòrsou den un hub sumamente importante pa e region aki.

C-MCC Worldwide lo operá di un manera efisiente i brinda fasilidatnan di kalidat haltu den nos Zona Franka pa su miembronan. Lo tin un proseso di screening riguroso promé ku un partido òf kompania por bira miembro di C-MCC i haña akseso na nos Zona Franka. Ademas, tur miembro mester ta establesé den e Zona Franka di Kòrsou i ta dispone di un kompania ku ta registrá aki na Kòrsou promé ku por tuma parti den e inisiativa aki. Esaki lo yuda stimulá nos ekonomia i brinda mas posibilidatnan den futuro.

E desaroyo di C-MCC Worldwide lo ta un parti íntegro di Airport City Master Plan i lo fungi komo un motor finansiero pa mas desaroyo i tambe yuda atraé mas kompanianan internashonal i turista na nos isla. Nos aeropuerto lo transformá den un sentro finansiero kaminda bankonan, kompanianan di seguro i otro institutonan finansiero lo establesé pa brinda nan servisio na kompanianan situá den Airport City. Di e forma aki otro partinan di e Airport City Master Plan lo por wòrdu implementá, manera e proyekto inovativo di Sea Water air-Conditioning (SWAC).

E proyekto aki tin un potensial grandi i C-MCC Worldwide lo invertí un suma total di 900 mion dòler den nos ekonomia, kreando direktamente 11,000 kupo di trabou nobo den e Zona Franka. Ademas kalkulashon makro ekonómiko ta indiká ku 15,000 kupo di trabou adishonal lo resultá di un manera indirekto for di e proyekto aki. E proyekto lo yuda generá èkstra divisa i impuesto pa Kòrsou, yuda stimulá nos enseñansa i promové Kòrsou komo e hub finansiero mas importante den e region Karibense. Kòrsou lo wòrdu mirá komo e Dubai òf e Hong Kong di e region aki.

Promé ku drenta e fase di renovashon di e terminal bieu i konstrukshon di edifisionan nobo, C-MCC lo traha intensivamente ku gobièrnu i otro stakeholdernan pa asina yega na un base fuerte legal ku ta kumpli ku tur eksigensianan legal. C-MCC su meta ta pa tin un bon relashon ku kompanianan lokal i tambe pueblo di Kòrsou pa asina huntu hasi e proyekto aki mas eksitoso ku ta posibel. Pa e motibu aki, boso ta keda kordialmente invitá pa bin tuma parti di e selebrashon aki.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *