WILLEMSTAD.- ‘ Na momentu ku bo forma un gobièrnu, partidonan ta negoshá pa karteranan. Den e kaso aki partido Pueblo Soberano a haña kartera di Desaroyo Sosial, Labor i Bienestar (SOAW) i esun di Gobernashon, Planifikashon i Servisio Públiko (BPD).

Na momentu ku nos tabatin den negoshashon, mirando ku mi ‘background’ ta rekurso humano.

Mi a indiká na mi lider ku nos por hasi hopi bunita trabou den e ministerio aki.

Esei ta e kaminda mi a sali. Mi tin e ekspertisio.”

Asina Ruthmilda Larmonie-Cecilia, minister demishonario di Desaroyo Sosial, Labor i Bienestar a splika ayera durante un rueda di prensa.

‘Mi a pone ministerio Sosial riba pia. Ya kaba proyektonan ta kanando. Ta un asuntu di kaba ku e proyektonan. Anto ministerio di Gobernashon, Planifikashon i Servisio Públiko, na mi opinion nos mester dun’é e lugá ku tin mester.

Pasobra mientrastantu ku nos no drecha nos aparato públ i ko, ni maske kiko nos hasi, gobernantenan no por goberná. Ta p’esei mi a bisa mi lider di partido duna mi e posibilidat di drecha e ministerio ei.” Larmonie-Cecilia a splika ku tabata su petishon pa bira minister riba un otro ministerio. ‘ Mi a indiká tambe ku mirando e kartera di Asuntunan Sosial e ta keda pa partido Pueblo Soberano lo mi sigui duna mi aporte pa mi proyektonan ku ta kanando sigui kana. Un minister di Pueblo Soberano mes por sigui ku e maneho ei.”

Larmonie- Cecilia a splika ku hopi hende no a komprendé dikon el a laga e ministerio SOAW. ‘Pero mi a splika ku un di mi ekspertisionan ta rekurso humano i asuntunan sosial. Mi ta kontentu ku e dos ministerionan ta keda den mesun partido i nos por sigui kanalisá nan.”

Bron: Extra