Extra | Lionstone ku kaso den korte pa daño i perhuisio

Lionstone ku kaso den korte pa daño i perhuisio

WILLEMSTAD.- Abogado Chester Peterson a pidi korte pa skucha testigunan relashoná ku e benta di Hotel Marriott. E abogado aktuando na nòmber di grupo Lionstone no ta di akuerdo ku e proseso di benta ku a tuma lugá pero ta sugerí tambe ku e kompania ku a kumpra e hotèl tabatin konosementu adelantá di e ofertanan ku a hasi den e kaso aki.

“E proseso tabata kontaminá”, asina e abogado ta bisa. El a laga di komprondé bon kla den su korespondensia ku Korte ku Lionstone ta mek riba un daño i perhuisio pa loke e kompania a sufri den e proseso aki i tambe na su imágen.

Manera EXTRA a informá, anteriormente e aña aki a disidí ku ta bende e hotèl ku Orco Group i ku lo sera e hotèl pa dos aña. A retirá e trahadónan. Lionstone sinembargo ta reklamá ku el a hasi un mihó oferta i ku e lo a tene e hotèl habri durante rekonstrukshon. Ademas Lionstone ta bisa ku e tin eksperensia amplio den negoshi di hotèl kompará ku e grupo di Orco Bank, no solamente na Kòrsou pero na diferente parti di nos hemisferio. E eksperensia di Orco Group riba e tereno aki ta nulo.

Den un dokumentu amplio, abogado Peterson ta pidi pa tende testigunan komo preludio di un kaso den korte. E ta basa su mes riba “een verzoek om een voorlopig getuigenverhoor ex artikel 166 RV” ku a bai korte dia 25 di novèmber último. Abogado Peterson ta aktua na nòmber di Lionstone International Limited ku sede na British Virgin Islands representá na Kòrsou pa e bufete di abogado Peterson i Sulvaran. Segun e karta, ta e intenshon pa kuminsá un prosedura kontra Gobièrnu di Kòrsou, e kompania anónimo  Rif Resort Hotel N.V., e kompania anónimo Orco Bank N.V. i e kompania Piscamar Beach Resort.

E petishon di 14 página ta bai ampliamente den detaye riba e manera ku e prosedura a kana den e kaso aki i ta splika kon kosnan a kana for di dia ku dos siudadano (Capriles/Halabi) a aserká gobièrnu ku un garantia pa e hotèl. Nòmber di un gran kantidat di hende ta bin dilanti den e dokumentu ku a bai korte i lo bai skucha nan tambe si ta nesesario. Tambe ta splika kon e proseso a kana pa disidí ken ta haña e hotèl.

Komo un liña kòrá ta kore den e dokumentu ku diferente persona a hasi nan mes kulpabel di a duna informashon na tersera riba e proseso di destaho di manera ku esnan ku nan tabata favoresé a haña un bista di e oferta di nan kompetidor. “Lionstone ke haña prueba ku e proseso di benta di e hotèl tabata kontaminá. Tambe lo mester bin prueba ku a kambia e kondishonnan di e benta despues ku ya kaba e proseso tabata kanando ku e intenshon kla pa benefisiá e grupo ku a gana e oferta. E intenshon ta pa Lionstone finalmente haña un kompensashon pa e daño ku el a sufri den e proseso aki”, asina e karta ta bisa.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *