WILLEMSTAD.- Ayera nochi minister-presidente Hensley Koeiman a entregá retiro di su gabinete na gobernador Lucille George-Wout. “Ayera a bin kla ku dos miembro a kita nan sosten na gabinete, ku ta e parlamentarionan di Pueblo Soberano Melvin “Mac” Cijntje i Sherwin Leonora.

P’esei nos a bai gobernador. I na mesun momento nos a pidi gobernador pa disolvé Parlamento.
Koeiman:

“Mi a purba di haña lider di Pueblo Soberano awe durante dia. Nos a yama un reunion èkstra ordinario. Pasobra te ku djabièrnè pasá nos a sinta, e kuater lidernan (di MAN, PAR, PNP i Pueblo Soberano, EXTRA) huntu ku Omayra Leeflang di Un Kòrsou Hustu. Nos a palabrá ku djaluna nos ta bai ‘rond af’ pa e gabinete bai 12 i despues sigui amplia”.

Koeiman: “For di trempan nos tabatin intenshon pa amplia koalishon. Pa e motibu prinsipal ku nos por evitá loke ta pasando awor aki. Mi ta lamentá sinseramente lokual ta pasando awor aki, pasobra Kòrsou no meres’é esaki.”
For di elekshon di 5 di òktober Koeiman a mira un esfuersonan “ku no a bai niun momentu” pa basha gobièrnu aki abou. “Esaki tabata e meta prinsipal. I nos ta lamentá, pasobra nos ta bisa ku nos ta komprendé ku frakshon di Pueblo Soberano a kita sosten di gobièrnu na motibu di ‘Smart Zoning’. Mi tin ku prensa ta realisá, ku nos ta bezig ku un proyekto grandi di Guandong Zhenrong. Nos a mira un presentashon ku nos a laga duna den Parlamento. Segun nos e proyekto ta mustra bon. Ta un invershon bionario na Kòrsou. I si bo ta wak kuantu hende ta sin trabou awor aki na Kòrsou, esaki ta algu hopi importante. Awor aki nos ta trahando riba un presupuesto supletorio. Nos mester realisá ku nos mester traha pa nos ekonomia krese. Nos tin problema serio ku nos mester atendé ku hospital. Nos tin problema serio ku nos mester atendé ku InselAir. Tin problema ku desempleo, bibienda. I bo ta puntra bo mes ku tin wega ku ta tuma lugá, agèndanan skondí. Bo no por ta serio, si tin problema asina grandi ku bo mester atendé kuné, kosnan importante, serio. Anto bo ta konfrontá bo mes ku un situashon asina.”

Bron: Extra

Lo tin elekshon 28 di aprel

WILLEMSTAD,- Ayera anochi Minister Presidente Hensley Koeiman a entrega retiro di su gabinete na gobernador Lucille George-Wout. Despues Koeiman a splika prensa presente na Fòrti ku e ta lamentá ku parlamentarionan di Pueblo Soberano a kita sosten di gobièrnu. Segun Koeiman mester tin elekshon nobo 28 di Aprel.

Bron: Extra