WILLEMSTAD.- Tin plannan avansá riba mesa pa amplia e kantidat di kamber na Universidat di Kòrsou ku 200 unidat. Awor aki tin 100, i tur ta okupá, prinsipalmente pa studiantenan djafó.

E proyekto ta forma parti di e proseso pa hasi Universidat muchu mas atraktivo pa studiantenan lokal tambe. Un investigashon a determiná ku un di e motibunan di kon hopi studiante di Kòrsou ta bai afó ta ku nan kier sali for di bou di ala di nan mayornan. Nan kier nan libertat di moveshon i kòntròl loke studiamentu den eksterior ta duna nan. Pero ta konosí ku biba riba bo mes i studia den eksterior tin riesgonan tambe.

E kantidat di studiante ku no ta logra ta grandi, i esei ta un sekretu bon wardá. Enkuestanan bou di e studiantenan mes a indiká ku si nan tabata den e posishon pa haña un lugá di biba na Kòrsou mes, nan lo a keda aki. Ta den e kuadro ei mester mira e ekspanshon ku 200 kamber pa un total di 300 kamber. Esei lo habri e posibilidat pa e studiantenan ta riba nan mes maske nan ta keda riba nos isla. Opviamente ku e proyekto di ekspanshon ta interesante tambe pa studiantenan djafó konsiderando ku Universidat di Kòrsou ta moviendo mas i mas den direkshon di un universidat internashonal. Awor aki sinembargo a surgi un komplikashon komo ku Universidat lo a amplia e kantidat di kamber despues di tur e ehersisionan ku a hasi pa baha gastu, i tambe a base di e supsidio ku a primintí.

Manera EXTRA a informá ayera, gobièrnu di Kòrsou sinembargo a disidí pa kòrta ku 2.2 mion florin den fondonan pa Universidat, loke a kousa konsternashon na e instituto. Un karta furioso a bai pa gobièrnu pa rekonsiderá e desishon. No ta masha kla ku si e fondonan aki no bin, lo para e proyekto di ekspanshon di e kantidat di kamber komo ku e instituto lo mester skrap den diferente proyekto i programa. Si e ekspanshon sigui, lo konstruí e unidatnan riba tereno di Universidat mes. Universidat tin terenonan amplio ainda na su disposishon.

Informashonnan ku EXTRA a haña ta ku lo oumentá tambe e aspekto di seguridat na Universidat. T’asina ku awor aki tur hende por kana drenta, despues di a pasa bewaking. Ora bewaking no tei ta tur hende ta pasa libremente. Den futuro esei lo no ta posibel mas. Despues ku a analisá e situashon a yega na e konklushon ku mester bai tuma mas medida di seguridat na porta di e instituto.

Bron: Extra