WILLEMSTAD.- Lider di partido PAR, Zita Jesus-Leito ta kla pa bira minister di Salubridat, Medio Ambiente i Naturalesa den e gobièrnu nobo. Asina Jesus-Leito a splika ayera. ‘Mi a pasa screening, sin problema.”
Manera ta konosí Jesus-Leito ta keda proponé dor di su partido komo minister nobo. Otro kandidato pa partido PAR ta Eugene Rhuggenaath, ku na e momentu ei ta minister di Desaroyo Ekonómiko. E ke kontinuá su funshon.
Ayera EXTRA a skirbi ku segun fuentenan Servisio di Seguridat di Kòrsou (VDC) a duna un konseho negativo tokante Kenneth Gijsbertha komo minister den e gabinete nobo. Manera ta konosí partido MAN a proponé Gijsbertha komo minister di Finansa.
Hensley Koeiman, proponé komo minister-presidente nobo pa e gabinete nobo, supuestamente tabata un kaso di diskushon pa VDC, pero na final a pasa proseso di screening tòg.
Esaki por nifiká ku formashon di gabinete nobo lo tuma mas tempu. Segun Jesus-Leito kandidatonan di PAR no konosé niun problema. ‘Tur kos ta kla pa nos traha komo dos minister potente ku un frakshon hopi bon.”
Manera ta konosí partidonan MAN, PAR, Pueblo Soberano i PNP a yega na un akuerdo pa forma un gobièrnu nobo. Tur e partidonan a entregá nòmbernan pa bira minister. Te ainda e proseso di screening no ta kla.
Bron: Extra
