WILLEMSTAD.- Partido MAN ayera a reakshoná riba e notisia ku Ministerio Públiko a hasi entrada hudisial den 3 kas diferente, entre otro na kas di Gerrit Schotte i Charles Cooper.
Motibu di esaki tabata e investigashon ku Ministerio Públiko a kuminsá basá riba e keho ku parlamentario Yael Plet a entrega dia 18 di febrüari e aña aki. Plet a entrega keho ku un kaso di posibel soborno. Despues Ministerio Públiko a kuminsá ku un investigashon ku a indiká ku tin 1 parlamentario ku resientemente a keda soborná. Awor Schotte i Cooper ta sospechoso den e kaso di soborno.
Partido MAN ta duna di konosé ku a tuma nota di algun entrada hudisial ayera durante dia bou di liderazgo di un wes-komisario.
‘Ta hasi menshon ku e entradanan aki tin di aber entre otro ku e denunsia ku e miembro di Parlamento pa partido MAN Sr. Yaël Plet a hasi relashoná ku intento di soborno. Partido MAN ta hopi orguyoso di tin Yaël Plet komo miembro di nos organisashon polítiko i ta sostené Sr. Plet kompletamente.’
Sr. Yaël Plet a huramentá komo miembro di Parlamento i mester kumpli ku su huramentashon. Ta un deber i obligashon síviko di kada siudadano ku ta respetá su mes pa denunsiá kosnan inkorekto i kontra di lei ku ta tuma lugá den nos Pais. Por lo demas partido MAN manera semper ta bisa ku ora un kaso ta bou di investigashon hudisial, partido ta laga hustisia hasi su trabou, respetando nos sistema di ‘trias polítika’ i nos demokrasia.
Bron: Extra