Extra | Maria Liberia ta sostené akuerdo ku Guangdong Zhenrong

WILLEMSTAD.- Eks-promé minister Maria Liberia-Peters ta apoyá e akuerdonan tentativo ku a sera ku e konsorsio chines Guangdong Zhenrong. “Mi kier ta franko.

Nos no por warda te 2019 i aki tin un bon oportunidat ku a presentá”, asina e eks-mandatario a deklará. Te awor aki ta promé minister saliente Ben Whiteman i presidente di e Tim Multi-Displinario, Werner Wiels so a papia i por sierto defendé e akuerdo públikamente i ku fervor pero ta e intenshon pa otro miembronan di e grupo speshal aki tambe sali i papia. Den nan tin hendenan di trayektoria amplio den nos komunidat. Ku e aserkamentu aki kier kibra e persepshon ku ta dos pipita di hende a tuma e desishon i ku e desishon no ta kargá pa hendenan ku a gana nan reputashon den nos komunidat. Sra. Liberia-Peters, konsiderando su eksperensia den pasado ku desaroyonan di e refineria, ta miembro di e grupo.

El a splika ku lógikamente 1985, tempu ku Shell a bai no ta 2016. E tempu ei a disidí den konsulta ku Venezuela lo tene e refineria habrí entre otro pa garantisá stabilidat sosial na Kòrsou. A base di esei a sera un akuerdo preliminar ku PVDSA ku lo a dura 5 aña. Despues a pone 10 aña mas aserka, i mas despues dos bes 10 aña mas pa un totalidat di 35 aña. E kontrakt aktual ta vense na 2019. Ya kaba a disidí ku lo “anulá” e akuerdo den 2017 pa asina duna márgen pa e negosashonnan ku ta tumando lugá.

Sra. Liberia a bisa ku un di e aspektonan ku mester tene kuenta ku n’e ta ku den 1985 e refineria tabata den relativamente bon estado. Tabata otro tempu. E diferensia ku awendia ta ku na momentu ku ta negoshando mester tene kuenta ku estado di e refineria i e eksigensia di komunidat i di gobièrnu pa hasi e refineria limpi. Den e kuadro aki ta masha importante ku ta tene kuenta den modernisashon di e refineria ku e aspekto di medio ambiente. “Aki algun aña barkunan di turista mester yega aki i lo no ripará nada mas di e emishon di polushon ku tin awor aki. P’esei tambe ta trahando duru pa usa pa gas komo fuente di prosesonan di produkshon”, asina el a bisa.

E eks-mandatario a bisa tambe ku ta negoshando e refineria i e desaroyonan na Bullenbaai apart. Ta dos tema diferente, asina el a splika. El a rechasá tambe ku e grupo ta trahando pa nan mes benefisio manera algun persona a sugirí. “Nos ta wak futuro generashonnan. Nos no ta wak nos mes”, asina el a bisa un poko disgustá pa e personanan ku semper tin un pensamentu negativo ora e tipo di negosiashonnan aki tuma lugá.

Pa loke ta trata e aspekto ekonómiko, e eks-mandatario a rekordá ku 2019 ta bai bira un aña tòf pa Kòrsou den sentido ku mester paga bèk e bononan ku Ulanda a kumpra nan interes abou. Off-shore tambe lo kaba finalmente manera nos tabata konosé den pasado. Ta solamente ku un ekonomia ku ta kana bon por produsí e plakanan pa paga bèk i duna servisio na komunidat pa loke ta trata tareanan di gobièrnu, asina el a bisa.

Próksimamente mas di e miembronan di e tim multi-displinario lo bin dilanti pa duna nan opinion riba e materia aki. Miéntras tantu ta bon pa bisa ku e periodo di 28 dia ta yegando pa e konsorsio chines presentá un “letter of credit” di un banko di reputashon pa supstansiá su plannan. No ta masha kla si ta trata aki di 28 dia di trabou òf mester konta e finnan di siman tambe den dje for di dia ku a firma e Heads of Agreement. Di tur manera, e desaroyonan a yega tambe na nivel mundial kaminda e siman aki tabata un publikashon grandi, entre otro di e agensia Reuters. Reuters a papia ku e negoshadó prinsipal chines ku a afirmá nan intenshonnan serio pa realisá e plannan na Kòrsou.

Bron: Extra