WILLEMSTAD.- Tantu Refineria Isla komo CRU aparentemente lo ta kumpliendo ku nan pèrmit di molèster, nan no ta violando e limitashonnan ku tin stipulá den e pèrmit aki.

Pero pa Minister Suzy Camelia-Römer ainda por papia di polushon di aire, i esei tòg ta inakseptabel i komo tal konhuntamente ta trahando riba posibel solushonnan pa esaki. Asina e mandatario a duna di konosé durante e enkuentro semanal ku prensa ayera. Segun sra. Camelia-Römer, t’asina ku el a sinta resientemente ku e diferente gruponan di interes den komunidat riba henter e situashon di polushon di aire dor di refineria. Nos por bisa ku Isla i CRU/BOO ta kedando denter di e normanan permití pa loke ta polushon, pero p’e e loke por konstatá último tempunan no ta akseptabel.

Ultimo tempu tin hopi fakelmentu, ku ta kondusiendo na polushon. Pero lo por tin solushon pa e problema aki. Un dje posibel solushonnan ta pa enbes di usa asfalt brutu usa gas ora ta sende e fòrnunan bek. Pero den kombersashon ku el a hiba ku tantu CRU komo Isla a yega na un palabrashon ku ta sinta ku Inspekshon di Medio ambiente pa atendé ku e polushon di aire. Nan a keda di inventarisá si por usa otro tipo di kombustibel ora di sende e fòrnunan bek, sea ta gas òf ‘stookoilie’.

Segun e titular di Salubridat, Medioambiente i Naturalesa den esaki e tin ful sosten di Promé Minister bou di kende e Refineria Isla ta kai. E mandatario ei tambe ta di mesun opinion, esta ku mester hasi mas na baha polushon di aire, i mester buska un solushon di awor pa aki seis luna ku ta nifiká ku ta redusí e kantidat di polushon ku tin den aire. Segun Sra. Camelia-Römer, p’e no ta akseptabel ku nos ta biba den un pais kaminda kada bes skol tin di sera pa motibu di polushon etc., e ta algu ku mester atendé kuné.

Den kombersashon ku ekspertonan di CRU i Isla el a komprondé ku si haña un solushon p’e problema di fakelmentu, lo tin mitar dje problema dominá kaba. Pero e problema aktual ta ku CRU no por/ta entregando sufisiente stoom na Isla. Pero ya a bestèl e aparatonan nesesario i den término di dos siman asina esei lo ta resolvé. Si pa hopi hende e huma ku ta ser produsí regularmente ta algu normal, p’e si esei no ta algu normal sino ku e tin di baha. Esei lo ta un promé paso pa drecha e kalidat di aire.

Bron: Extra