WILLEMSTAD.- Masoneria ta un organisashon eksklusivamente pa hende hòmber, pues hende hòmbernan so por bira mazòn. I den e organisashon aki e hòmber mester tin e konvikshon i ta firme den loke e ta hasi.

I e presensia di hende muhé lo por kita su enfoke. Es mas, masoneria tin su sekretonan en bèrdat, pero no ta kosnan ku karakter diabóliko, ni di konspirashon. Ta sekretonan ku un miembro lo sinti su mes orguyoso di ta un mazòn. Esei EXTRA por a konkluí for di un entrevista ku nos a sostené e siman aki ku srs. Rudy Naaldyk i Humphrey Genaro di Masoneria Phoenix-227 situá den Emmastad.

Segun sr. Genaro, hopi ta esnan ku ta kere ku Masoneria ta un organisashon ku yen sekresia, i ku su miembronan ta di tal manera doktriná ku nan no ta papia nada di loke ta sosodé internamente. Masoneria tin su sekretonan, pero si esei t’e motibu pa un persona interesá na bira miembro, anto su entusiasmo lo baha te na un mínimo.

Segun sr. Genaro, algun dje sekretonan den masoneria ta grep di man ora ta saludá otro, palabranan klave, señalnan di atvertensia i ritualnan seremonial. No tin nada diabóliko den ritualnan di masoneria. Algun dje seremonianan ku sa tin ta relashoná ku instalashon di miembronan nobo i seremonia pa entiero di un miembro ku a fayesé. Pues e sekretonan ku masoneria tin ta kosnan ku el a heredá for di pasado, for di prinsipio ku lantamentu di e hurisdikshon mas ku 300 aña pasá. E seremonianan semper ta tuma lugá den loke den masoneria nan a yama tèmpel.

Aparte di e emblemanan, e vestuario ta loke tur hende ta rekonosé mas lihé di mazònnan. E mazòn ta bisti su trahe koló pretu, tin un skòrchi spesial i hanskun blanku. Miembronan ta liber pa bisti prenda manera entre otro renchi ku e emblema di Masoneria òf feneta na nan trahe.

HOMBER SO

Ta bon pa informá ku e organisashon di Masoneria a haña bida komo 300 aña pasá bou di hòmber di fishi. P’esei mes e emblema di un kompas i un winkelhaak. E filosofia di Masoneria ta ku kada miembro mester ta un hòmber di fishi pa yuda kòrta e “piedra” di tal manera ku e ta mas perfekto posibel pa asina e tèmpel simbóliko pa humanidat ta mas nèchi tambe.

Masoneria ta un organisashon di boluntario, fraternal ku ta konsistí di hòmbernan di bon boluntat, bon karakter i bon reputashon, i ku ta kere den un Ser Supremo. Tur ta praktiká e espíritu di fraternidat universal pa yuda e ser humano.

Bron: Extra