WILLEMSTAD.- MCB por mira atras riba un aña eksitoso. Den 2016 nan a kontribuí ku 153 mion na kaha di gobièrnu. Esaki MCB ta informá den su relato anual di 2016.

Pa 2016 Grupo MCB mester paga NAF 31 mion na impuesto di ganashi basá riba e resultadonan di nos operashonnan, i nos Grupo a paga tambe NAF 6 mion na impuesto di volúmen di benta (‘OB’).

Nan empleadonan a paga NAF 30 mion na impuesto di suèldu, miéntras a paga NAF 25 mion na primanan sosial. Huntu, e impuesto i e primanan menshoná ariba a kontribuí NAF 153 mion na e kaha di Gobièrnu di nos paisnan.

Durante 2016 Grupo MCB a paga su empleadonan NAF 103 mion na salario, sin konta e benefishinan sosial, prima di penshun, seguro médiko i otro tipo di seguro. Pa 31 di desèmber 2016 Grupo MCB tabatin 1.513 persona empleá na tur e islanan huntu.

Komo miembro empresarial sosialmente responsabel di e komunidatnan ku nos ta sirbi, den e aña di MCB su di 100 aniversario nan a disidí pa nan selebrashonnan di aniversario mas ku nunka mester a reflehá gratitut i kompromiso kontinuo ku e komunidatnan aki. E enfoke tabata riba hubentut i sostenibilidat. Pa enfoká riba sostenibilidat i pa hasi siudadanonan mas konsiente di e medioambiente den kua ta biba, riba Dia di Tera (22 di aprel) a lansa e proyekto ‘100 aña, 100 palu, 100 kolega’ kaminda koleganan huntu ku e komunidat a planta 100 palu.

Futuro di nos pais ta dependé altamente di edukashon i salú di su hubentut i MCB a enfatisá esaki den un intento pa eduká hóbennan i nan mayor i maestronan riba importansia di salú i kon pa drecha esaki, pa medio di diferente proyekto bou di e kabes #100pasalú, ke men 100% pa salú! E dos proyektonan prinsipal tabata #MiTrònchi, enfokando riba mucha den e edat di 4 pa 12 aña, i #Mibòdita100 pa e hóbennan mas grandi te 18 aña.

Pa e muchanan entre 14 pa 18 aña Banko a organisá tambe ‘100-100 Sigur’, un seminario riba konsientisashon di seguridat pa kasi 3000 tiner di 17 skol. MCB ta sigui bisa ku pa demostrá nan apresio pa e hendenan grandi kendenan a yuda Banko alkansá e logro aki, nan a organisá e siman di tayer titulá ‘Biba bon i yega 100’: biba bon i yega 100 aña! E tayernan a enfoká riba importansia di un estilo sano di biba pa e mas ku 1250 penshonadonan ku a partisipá.

Tur aña den desèmber nan ta organisá e siman di boluntario, pero na 2016 a kambia e konsepto den un fin di siman grandi di boluntario kaminda tur empleado tabata envolví den trabou boluntario bou di e nòmber: ‘Live, love, smile with MCB’.

A selektá e diferente proyektonan den e siguiente kategorianan: edukashon & deporte, salú & bienestar sosial, i bario & resiklahe. Na total mas ku 1000 kolega e ehekutá e mas ku 100 proyektonan! MCB-Prize • Den nan aña sentenario a otorgá e prestigioso Premio MCB pa e di 20 biaha na un organisashon, persona òf instituto ku tabatin un impakto positivo riba nos komunidat.

Na 2016 e premio a bai pa e fundashon National Archeological Anthropological Memory Management (NAAM). For di 1998 e instituto aki a sigui ku e trabou di e predesesor AAINA pa identifiká, registrá, dokumentá i konservá e patrimonio kultural material i inmaterial di Kòrsou, Boneiru i St. Maarten. Na okashon di 100 aña di eksistensia di refineria Isla na Kòrsou, NAAM a organisá un eksibishon di e enorme impakto ku e refineria tabatin riba aspektonan di tur dia den bida na nos isla for di su establesimentu na 1915.

E trabou inkalkulabel di NAAM pa nos islanan por komprendé nos pasado pa nos ta mihó prepará pa guia nos futuro, ta un gran ehèmpel di sostenibilidat i ta hasi nan un resipiente bálido di e MCB-Prize 2016.

Pa loke ta futuro, MCB ta bisa den su relato anual ku 2017 i despues lo trese pa nan ta difísil pa bisa, spesialmente despues di e eventonan ku a tuma lugá na 2016, pero nan por mira klaramente ku ‘the times are a-changing’, ku mas teknologia den nos bida diario i e spit haltu di e kambionan rònt di nos.

Pero komo grupo bankero ku a kaba di selebrá su 100 añanan di kresementu, nan a siña ku mester i lo sigui adaptá na e spit grandi di e kambionan rondó di nos i kaminda por nan lo kana dilanti ku e kambionan deseá pa medio di inovashonnan di produkto i servisio i desaroyando i entrenando koleganan.

Sinembargo, mas ku nunka MCB ta hopi gradesido na e konfiansa ku koleganan, klientenan, komisarionan, akshonistanan, i supervisornan a duna durante e último 100 aña i ta spera di por sigui gosa di nan konfiansa pa e siguiente 100 añanan. Sin e respaldo di komunidatnan kaminda nan ta biba i sirbi na tur e islanan, MCB lo no por a alkansá e logro aki: masha danki na tur!

Bron: Extra

MCB tambe a sinti efektonan di ekonomia yen di reto den su resultadonan

WILLEMSTAD.-Maduro & Curiels Bank a presentá nan relato anual 2016. Un relato ku tur loke MCB a hasi den 2016, nan kontribushon ku komunidat di Kòrsou i tambe ku nan personal.

Den e balansa 2015 a hasi algun korekshon ku a bai na 2016 esaki relashoná ku e balansa konsolidá i kapital propio.

Den e aña di MCB su 100 aniversario, pa promé biaha e aktivonan total di Grupo MCB a surpasá e punto di NAF 7 mil mion. E aktivonan total a krese ku NAF 369 mion, òf 5%, pa alkansá NAF 7.332 mion.

E depósitonan di kliente a surpasá NAF 6 mil mion pa promé biaha. E fiansanan i forskòtnan na kliente a keda igual na NAF 4 mil mion (0% kambio) pa di dos aña konsekutivo.

Mas aleu e relato 2016 ta menshoná ku a reforsá e kapital propio, sin konta e interesnan minoritario, ku NAF 36 mion (5%) pa alkansá NAF 778 mion. Grupo MCB ta konsiderá un kapitalisashon firme un forsa klave i unu pa kua gerensia ta para p’e i ku komunidat, nan klientenan i personal por sigui konfia i konta kuné.
Relashoná ku e kuenta di ganashi i pèrdida MCB ta trese dilanti den su relato anual ku e entradanan presentá den nan estado finansiero ta bini di e Grupo su aktividatnan tantu lokal komo internashonal. E fluhonan di entrada ta sigui di ta bon diversifiká.

Operando den ekonomianan yen di reto, a resultá den un redukshon den e resultado neto konsolidá despues di impuesto di 8.6% òf NAF 128 mion, i tambe den un redukshon di entradanan operashonal neto di NAF 160 mion, un kaida di 8.2%.

E resultado mas abou ta kousá prinsipalmente pa un bahada di entrada operashonal di NAF 5.1 mion òf 1.1%, debí na NAF 4.7 mion (-1.6%) ménos na entrada neto riba interes i ménos entrada for di transakshonnan di kambio di valuta i otro ingresonan. E entrada riba interes a baha debí ku tantu e kresementu di e volúmen a keda atras komo ku e márgen di interes a kontraé.

Gerensia di MCB huntu ku hunta di supervishon su komishon di Krédito kontinuamente ta monitoriá e Grupo su riesgonan di krédito i ta sigurá ku e fiansanan den nan portafolio ta keda bon diversifiká pa tipo di kliente, tamaño, durashon i sektor.

E portafolio di fiansa na klientenan komersial huntu ku e fiansanan na e entidatnan den man di gobièrnu a demostrá un subida di NAF 13.2 mion, i kombiná ku e bahada di e fiansanan na klientenan partikular, ta resultá den 0% kresementu den e portafolio total di krédito.

Bron: Extra