WILLEMSTAD.- Korte di promé instansia ayera a trata e kaso di atrako horendo i lamentabel ku a tuma lugá dia 3 di aprel último, den kaya Hematita.
Ta trata di e kaso kaminda e víktima di fam Leito (69) a pèrdè su bida ora 3 hòmber kara tapá a kore drenta e famia su kas pa tira atrako.
Despues di un forsageo ku e víktima, e akusado a lòs e tiru fatal ku a kosta bida di Leito.
Ayera tur tres sospechoso tabata presente den korte.
E famianan di e víktima tambe tabat’ei presente na gran kantidat.
E akusado Koeiman ta e úniko ku a atmití su kulpabilidat. El a bisa ku e tabata un di e personanan ku a kometé e atrako, pero tabata den kompania di dos otro sospechoso ku no ta ni Mejia ni Rosaria.
Na final tur akusado tin derechi riba último palabra.
Segun Mejia, su konsenshi ta limpi limpi i ku e no tin nada di hasi ku e kaso di atrako.
Mejia a duna di konos’é ku for di dia ku polis a tir’é na St. Maarten den su kustia, pa un kaso di atrako ku e tabata aden, el a siña su lès i nunka mas no a hasi nada di esakinan.
Mejia a keda para riba ku e no konosé Rosaria.
E akusado Rosaria a bisa den su último palabra ku e tin tantu dia será pòrnada pa motibu ku e no tin nada di aber ku e atrako.
Segun Rosaria el a laga su famia su trabou i su yu atras i ku e ke bai kas pa e kuida nan.
Segun Rosaria e tin e fishi di karpinté den su man i ku e no mester di kometé niun atrako.
Pa loke ta trata e akusado Koeiman ku ta e úniko ku a atmití, a duna di konosé ku e no tin nada di bisa den e kaso aki.
Dia 27 di sèptèmber e kaso lo bolbe bin dilanti den “Regiezitting” kaminda tantu abogadonan komo fiskal por hasi nan deseonan di investigashon promé ku e kaso keda tratá dia promé di desèmber binidero.
Bron: Extra
Dos di e 3 sospechosonan asesinato Hematita a ninga redondamente
WILLEMSTAD.- Manera nos a antisipá, ayera kaso asesinato kaya Hematita ku a tuma lugá dia 3 di aprel último, a keda trata den pro forma.
Ta trata di e kaso kaminda e víktima Edward Anthony Leito nasé na Kòrsou 12 desèmber 1947, a pèrdè su bida, despues ku el a keda asesiná den su propio kas durante un atrako.
Pa ku esaki e akusadonan Christoffer Koeiman (27) Sherwin Rosaria (21) ámbos nase na Kòrsou i Anthony Mejia di 30 aña nase na St Maarten, a presentá dilanti hues.
Nan tur 3 ta keda akusá pa atrako brutal ku violensia i ku morto komo konsekuensia na momentu ku nan a drenta ku kara tapa.
Fiskal Out ayera tabata esun ku a hiba e akusashonnan di parti Ministerio Públiko. El a bisa ku riba 3 di aprel 3 hòmber kara tapa a kore drenta e kas di famia, pa tira atrako. Un di nan ku a topa ku e víktima a forsagea kuné ku arma den man, pa despues tir’e mata.
Segun fiskal, ainda e tin ku duna korte un prosèsverbal di e imágennan ku a keda kaptá, resultado di prueba di DNA ku tur 3 sospechoso a hasi boluntariamente.
Tambe fiskal a duna di konos’é ku pruebanan di rastro di e akusadonan den e bibienda a sali negativo.
Rosaria ku a keda detené 9 di mei na momento ku e tabata saliendo pa Ulanda, a ninga redondamente su partisipashon den e atrako. E akusado Koeiman si a atmití di tabata involukrá den e atrako, pero ku dos venezolano.
Abogado di e akusadonan Mejia i Rosaria a duna di konosé ku su klientenan ta ninga nan partisipashon den e atrako. E abogado a duna di konosé ku na momento ku Rosaria a keda detené na Hato, e tabatin sèn riba dje i ku esaki tabata su propio plaka ku el a spar pa bai Ulanda kuné.
Tambe el a bisa ku su kliente niun momento so no tabata trata na hui. Segun e abogado su kliente Rosaria tabata plania kaba pa bai Ulanda.
E abogado a duna di konosé mas aleu ku no tin motibu pa keda ku su klientenan sera mirando ku no tin niun prueba konkreto i nada ku ta inkriminá nan den e atrako. E abogadonan a pidi pa skucha mas testigu den e kaso aki.
Fiskal Out a pidi hues van den Enden pa rechasá e petishon, mirando ku tin sospechonan fuerte kontra e akusadonan Mejia i Rosaria.
Bron: Extra