WILLEMSTAD. – ‘Algun luna pasá nos a ofisialisá nos organisashon polítiko. Ora nos a instituí e partido polítiko, nos no a pensa nunka ku den korto tempu asin’aki e movementu polítiko por a haña un aseptashon asina grandi den komunidat di Kòrsou”, asina Menki Rojer a bisa ayera durante presentashon di lista di e partido Kòrsou Di Nos Tur.

Rojer ta presidente di e partido. ‘Un kos ku a duna nos hopi satisfakshon ta e forma aselerá ku e aseptashon ta bini pa e organisashon polítiko. Nos a hasi nos enkuestanan, nos a kana bario, nos a kombersá ku hende di diferente sektornan den e komunidat.” Segun Rojer mayoria di e hendenan a bisa ku “Kòrsou Di Nos Tur” tin tur potensial pa gana elekshon.”

Rojer: ‘ Nos nòmber ta “Kòrsou Di Nos Tur”. Nos porta ta habrí pa tur sorto di hende. Nos reto ta hopi grandi. P’esei nos tin un lista ku hende for di diferente disiplina, ku sa presis kiko e nesesidat ta di nos pueblo i kiko ta e anhelo ku pueblo tin.

Pueblo mester tin un gobièrnu kaminda e ta sinti su mes na kas. Manera nos lider polítiko Amparo dos Santos ta bisa: ku bo mester saka e hòmber poder for dje bou, trese ariba pa bo tin felisidat den kas aki na Kòrsou. Esaki tin ku wòrdu supstansiá dor di un organisashon polítiko. Nos ta konsiderá pueblo, i spesialmente hende di ménos rekurso, komo esnan protagonista den henter e proseso aki. Pa un dia nos por yega na felisidat den e lugá aki.” Segun Rojer e trabou ta sumamente duru. ‘ Nos a haña hopi atake di kontrinkantenan polítiko di tur forma, pero e kueru di nos hende ta diki.” Rojer a splika ku e ta spera ku e partido lo haña koperashon di prensa ophetivo tambe.

Bron: Extra