WILLEMSTAD.- Abogado Peppie Sulvaran di Kòrsou Fuerte i Outónomo den deklarashonnan formulá na un emisora radial siman pasá a bisa entre otro ku si ta nesesario lo mester pone Kòrsou na kandela pa logra ku ta baha e leinan di konsenso fo’i mesa.
E abogado a papia tambe di dramamentu di sanger si esaki ta nesesario pa yega na e meta ku Kòrsou Fuerte i Outónomo ta hibando den nan lucha pa eliminá e leinan di konsenso ku ta vigente fo’i momento ku Kòrsou a optené status outónomo den Reino. Omayra Leeflang di Un Kòrsou Hustu despues di a skucha e loke el a yama tirada di e abogado a konkluí ku ministerio públiko pa kuminsá mester pidi grabashon, skucha esaki ku atenshon i eksplorá e opshonnan pa aktua kontra e abogado, sigur pa e mensahe peligroso ku e ta mandando, un mensahe di karakter instigante pa motibu di menasanan di dramamentu di sanger i pone Kòrsou na kandela.
E abogado i tur otro ku ta pensa meskos kuné nan tin pleno derechi pa papia loke nan ta pensa òf deseá pero e derechi aki no por bira libertinahe òf instigashon pa violensia e parlamentario di Un Kòrsou Hustu a bisa. Mas aleu e parlamentario tabatin un remarke kritiko riba e akuerdo di gobernashon ku partidonan a firma djaweps na Barber.
Den e akuerdo tin un pasashi ku ta bisa ku pueblo di un forma demokrátiko ta bai haña oportunidat pa papia riba su status aktual. No a usa e palabra referendum pero klaramente e teksto ta mustra definitivamente den tal direkshon i esei ta di lamentá ku un biaha mas ta bai habri e herida di Si ku No i un biaha mas ta bai pèrdè tempu miéntras tin desishonnan grandi i importante ku mester kai den próksimo luna- i añanan Omayra Leeflang a bisa. El a referí aki na por ehèmpel e kontrato di lease di nos refineria ku e konsorsio chines òf un otro ku ta bin manehá e refineria.
Omayra Leeflang a referí na desishonnan ku mester kai den próksimo dos añanan riba areglo fiskal den Reino i e debe ku nos mester paga bek na Ulanda. Tur e kosnan aki meresé atenshon di gobièrnu i den e kuadro aki no tin espasio pa pèrdèmentu di tempu ku diskushonnan riba struktura estatal Omayra Leeflang a konkluí.
Bron: Extra
Naschrift KKC
Ze heeft gelijk. Weg met die totalitaire, terroristische aan de maffia (MFK) gelieerde organisatie KFO.
Ga naar huis mens!