Extra | ‘MFK lo bin ku moshon di deskonfiansa kontra gobiernu-Whiteman’

WILLEMSTAD.- Frakshon di partido MFK awe durante reunion di Parlamento lo bin ku un moshon di deskonfiansa kontra Gabinete demishonario Whiteman, Segun MFK: ‘ Koalishon Whiteman II nunka mester a firma akuerdo ku kompanianan chines djasabra anochi sin aprobashon di Staten.

” Tambe partido ke investigá posibel korupshon tokante e akuerdo ku kompania chines. Segun lider di MFK Gerrit Schotte esaki mester sosedé bou di investigashon di Kontraloria General. ‘Nos ta mira ku den pasado resien na Brasil den kaso grandi di korupshon di Petrobas hopi minister i otro mandatario tabata enbolbí. Colombia tambe a konosí un skandal di sektor di energia. Nos mester siña for di ehèmpelnan serka nos pais.” P’esei MFK lo bin ku un proposishon pa instalá un komishon antikorupshon di Kontraloria General inmediatamente pa repasá tur lokual ya a wòrdu firmá i tambe pa kana hinter e proseso di nos refineria i negosiashonnan te na final pa no pasa lokual a pasa na Brasil ku Petrobras ni tampoko na Colombia ku refineria Reficar ku ta e skandal mas grandi di korupshon den historia kolombiano.

Manera sekretario general di MFK Sithree van Heydoorn a skirbi den un Komunikado di prensa frakshon di MFK no a bai partisipá na firmamentu di un ‘Heads of Agreement’ entre gobièrnu di Kòrsou i kompanianan chines. MFK su punto di salida den esaki ta lo siguiente:

-Konforme art. 28 di nos areglo di estado Gobièrnu debe kuenta i rason na Staten.

-Konforme art. 29 insiso 2 di nos areglo estado si un minister òf ministernan no ta gosa mas di konfiansa di Staten nan tin ku entregá nan retiro. A manda bisa nan no firma nada mas i nan ta sigui manera nada no a pasa.

-Nos refineria i pais Kòrsou riba nan mes tin un posishon stratégiko/ geográfiko den e área di Karibe ku ta hasi, ku tantu nos haf komo nos refineria tin un balor finansiero muchu mas grandi ku nos ta pensa. Nos haf i nos refineria ta patrimonionan nashonal ku nos mester protehá i trata na saka lo máksimo for di nan.

-Un gobièrnu demishonario no tin outoridat pa kontinuá òf pa start den pleno kampaña elektoral ku e trayekto aki kaminda ta bai entregá (firma) gran parti di nos sektor petrolero i di energia den man di un solo kompania. Ni un gobièrnu den su periodo di gobernashon, no ta outorisá pa hasi esaki sin konsultá ku Staten.

-Na Kòrsou nos ta vota te ainda pa eligí miembronan di parlamento, e mayoria di asientonan den parlamento ta forma un gobièrnu i e mesun mayoria di asientonan aki ta apuntá nuebe minister pa dirigí e nuebe ministerionan.

Esaki ta trese kuné ku un gobièrnu responsabel mester bin parlamento ku un desishon di e embergadura aki, pa parlamento debatí i tuma un desishon, kaminda ku ta outorisá gobièrnu pa firma kualkier akuerdo. Mas ainda un gobièrnu kaminda gran parti di e ministernan no a ni partisipá den e kontienda elektoral na 2012, te pa pueblo a vota pa nan.

Bron: Extra