WILLEMSTAD.- Partido MFK i sr. Gerrit Schotte a disidí ku den e situashon aktual ta mihó bini ku plan-A, B, C i D.

E partido a hañ’é fòrsá di prepará pa un eventual elekshon, pero esei ta un dje plannan, pero pueblo por ta sigur ku ainda no a ehekutá tur pasobra MFK ta para tras di su konvikshon, esta ku e elekshon aki ta ilegalmente konvoká. Asina sr. Schotte a duna di konosé den un entrevista ku EXTRA ayera na okashon di entrega di listanan pa elekshon di dia 28 di aprel próksimo. Segun Schotte, e elekshon aki a ser yamá a base di un desishon robes tumá dor di gabinete Koeiman.

A forsa un elekshon i opviamente MFK lo tin di entregá un plan alternativo ku ta enserá ku e ta prepará pa si definitivamente resultá ku tin di bai elekshon. E preparashon aki ta pa no duna satisfakshon na ningun kontrinkante polítiko ku lo preferá di mira un elekshon sin lista di MFK. Plan-A a drenta na vigor for di dia 17 di febrüari huntu ku e moshon di 3 di mart. Plan-B a drenta na vigor na momentu ku e disposishon (beschikking) a keda aseptá. Plan-C ta start djaluna ku esfuersonan lokal i internashonal. E ta kere ku si tin kaminda ku ta trapa tratadonan internashonal, no por tin ningun otro organismo lokal ku por surpas’é. Plan-D e ta preferá di no divulgá ainda.

Segun Schotte, e chènsnan tabata 50/50 te ku siman pasá pero kada bes ku tin mas akshon i nan ta bira konkreto i e tin di desepshoná e grupo ei ku elekshon lo no tuma lugá dia 28 di aprel próksimo.

Pa loke ta e plannan ku tabatin pa bai Ulanda pa papia ku konseho di minister di Reino, segun Schotte ta un echo ku su sede ta na Den Haag. Serka tur isla den Reino ta eksistí un artíkulo ku ta bisa ku na momentu ku tin un gobièrnu òf un gobernador desobediente, ku Parlamento den su mayoria tin e derecho direkto pa atendé sea ku Staten General òf ku gobièrnu di Reino. Mirando ku ta esei ta e situashon ku a surgi resientemente, e ta hasi uso dje artíkulo ei. Awor Minister Plasterk a indiká ku pa otro siman djaweps e lo tin espasio pa risibí Presidente di Staten, sr. Gilmar Pisas, pero den e mesun rosea a puntr’é tambe si e tin apoderashon di gobièrnu di Reino pa e papia na nòmber di Reino. Pisas no por a duna kontesta naturalmente, i komo tal e yega na e konklushon ku lo no tin mester di biaha pa Ulanda, i ku e ta algu ku lo por atendé den un konferensia di video mes for di Kòrsou. Outomátikamente e grupo di 12 no ta di akuerdo pa manda henter un delegashon Ulanda.

Bron: Extra