WILLEMSTAD.- Lider di partido Un Kòrsou Hustu, sra. Omayra Leeflang, ta lamentá ku e no a haña niun informashon ofishal tokante firmamentu ku a tuma lugá djasabra anochi. Manera ta konosí gobièrnu di Kòrsou i Refineria di Kòrsou a firma un ‘Heads of Agreement’ ku e kompanianan Guangdong Zhenrong Energy Co. Ltd i China Zhenrong Holding Limited.

‘Mi no a mira nada”, sra. Leeflang a bisa djadumingu anochi. ‘P’esei mi no por reakshoná tampoko. Mi ta un persona ku ke basa su posishon riba echo.” Segun Leeflang komo miembro di Parlamento di Kòrsou el a keda invitá. ‘Pero mi no ke forma parti di seremonia si mi no a haña informashon.”

Leeflang no por reakshoná riba posishon di lider di MFK, Gerrit Schotte tampoko. Manera ta konosí Gerrit Schotte lo proponé un moshon di deskonfiansa kontra gabinete demishonario Whiteman awe mainta den parlamento di Kòrsou. Na opinion di Schotte gabinete demishonario nunka por a firma sin aprobashon di Parlamento.

Leeflang: ‘No puntra mi si mi ta di akuerdo di un moshon di deskonfiansa di un partido di oposishon. Mi no ta di oposishon, ni di koalishon. Mi ta di Kòrsou. Mi ta traha pa Kòrsou, mi ta sinta den Parlamento pa representá pueblo di Kòrsou. Mi no ta sostené proposishon pa e solo echo ku mi ta den oposishon. Mi ke sa kontenido di e akuerdo, despues mi por fiha mi posishon. Mi ta den parlamento pa wak kontenido.”

Lider di partido Un Kòrsou Hustu, Omayra Leeflang, ta di opinion ku minister Ben Whiteman no tabata outorisá pa firma pa henter e sektor di energia. ‘Esaki no tabata e tarea di e tim multidisiplinario. Segun mi tin hopi insertidumbre tokante e firmamentu. Mi ke klaridat tokante esei promé ku mi por fiha mi posishon.”

Bron; Extra