WILLEMSTAD.- Ben Whiteman no ta minister-presidente di Kòrsou mas. Ayera e tabata presente durante huramentashon di gobièrnu nobo. Despues di huramentashon Whiteman a baha trapi ku un gran sonrisa riba su kara.

‘Mi ta kontentu. Mi tin un sonrisa di satisfakshon. Pa motibu ku mi a haña oportunidat pa mi sirbi Kòrsou. Nos a hasi hopi bon trabou i nos a haña rekonosementu p’e tambe. Anto mi por bisa ku mi por kana ku mi kara na laira. Satisfecho di ku por a hasi kosnan ku nos a hasi. Prinsipalmente saka e pais for di e debakel ku e tabata.”

Whiteman ta kontentu ku pa su persona e trabou komo minister ta kla. ‘Mi ta spera ku e fundeshi poné, ta sigui konstruí riba dje. Anto mi ta sigui sirbi mi pais den kualke funshon òf kualke manera ku ta posibel.”

Whiteman a splika ku awor e ta bai sosegá un poko. ‘I tambe mi ta bai wak mi salú. Pasobra den e trabou aki, mi no a duna mi atenshon sufisiente pa mi salú i awor aki mi ta bai rekuper’é.” Whiteman a splika ku: ‘Semper tin reto den kosnan ku bo ta hasi. Sigur sigur den gobernashon. Tantu komo minister di Salubridat, komo minister-presidente e no ta fásil. Pero si bo tin un bon tim ku bo ta traha kuné, anto bo tin hende den komunidat ku ta sostené bo, e ta aliviá e trabou.”

Whiteman a bisa ku e tin konfiansa den e gobièrnu nobo. ‘Esaki ta desishon di pueblo. Mi ta respet’é. Anto nos tin di dun’é tur sorto di sosten ku tin pa asina nan hasi un bon trabou.” Whiteman a bira minister di Salubridat, Medio Ambiente i Naturalesa den aña 2012 pa partido Pueblo Soberano. Den aña 2015 el a remplasá Ivar Asjes komo minister-presidente.

Bron: Extra