WILLEMSTAD.- Segun presidente di Parlamento di Kòrsou Humphrey Davelaar Parlamento ta konsistí di 21 miembro. ‘Miembronan di Parlamento tin e ‘verplichting’, nan ta obligá, pa tur miembro nobo ku a keda skohé demokrátikamente, pa nan por drenta Parlamento.

Nan mester laga nan drenta. Esaki lei ta preskribí.” Asina presidente di parlamento Humphrey Davelaar a splika. Manera ta konosí dia 4 di yanüari lo tin reunion pa skohe un visepresidente di Parlamento nobo. Davelaar a laga grefir saka un konvokashon pa e reunion ei.

Dia 6 di yanüari lo tin reunion riba petishon di nuebe parlamentario tokante “Retiru di Presidente di Parlamento i eskoho di un Presidente i Visepresidente di Parlamento” i Deliberashon ku Gobièrnu en kuanto e akuerdo di gobernashon 2016-2020 “Dignidat humano ta sentral”. E nuebe parlamentarionan ta

Gerrit Schotte, Gilmar “Pik” Pisas, Jacinta Constancia, Charetti

Eduarda-Francisca (tur 4 di MFK), Amparo Dos Santos, Norberto Ribeiro, Meindert “Menki” Rojer (tur 3 di Kòrsou di Nos Tur), Marilyn Moses di Movementu Progresivo i parlamentario independiente Eduard Braam. Davelaar ta splika e ta bon prepará pa e dos reunionnan. ‘Mi ta prepará pa tur senario.

Den e kartanan ku e 9 parlamentarionan a manda, nan ta usa un tono hopi menasante den direkshon di entre otro presidente di Parlamento. Mi ta e miembro ku mas añanan den Parlamento. Mi lo mantené òrdu. Esaki ta mi obligashon na pueblo di Kòrsou. Mi mester duna e ehèmpel.” Davelaar ta duna pueblo di Kòrsou e garantia ku e lo hasi tur kos posibel pa laga e reunion pasa den tur trankilidat. ‘Mi ta garantisá esaki, pasobra mi lo tuma tur medida nesesario pa e representantenan di nos pueblo por hasi nan trabou den tur trankilidat.”

Bron: Extra