WILLEMSTAD,- ‘Konosiendo abitantenan di Sint Maarten mi ta sigur ku nan focus lo ta riba drecha bibienda i drecha e infrastruktura di nan pais. Promé kos ku nan mester drecha ta e pista di aterisahe pa avionnan por baha pa trese material.
Mester drecha e haf tambe. I poko poko drecha e hotèlnan pa hende por bin bèk i nan por kuminsá ku turismo atrobe.’ Asina presidente interino di Banko Sentral di Kòrsou i Sint Maarten Alberto ‘Chos’ Romero a bisa ayera durante presentashon di relato anual di aña 2016. Romero a splika ku 22 aña pasa, despues di e desaster ku orkan Luis a kousa na Sint Maarten, abitantenan a mustra un ánimo hopi grandi pa drecha e pais. ‘E mentalidat tabata hopi impreshonante i mi ta sigur ku nos lo mira esaki bèk e aña aki.’
Romero a splika ku e ta na altura ku e situashon ta mas pió ku 22 aña pasa. I tambe e no sa tur e detaye di e situashon di awor. ‘Pero mi ta spera ku nan lo drecha e pais i den un periodo di seis luna i un aña nos lo mira ku nan a drecha hopi kaba. Por ta no manera mester ta. Pero mi ta sigur ku den un periodo di un aña i mei te dos aña e ekonomia di Sint Maarten lo ta ‘back on track’.’
Ayera Banko Sentral a presentá relato anual di 2016 ku ta enserá tambe balotashonnan tokante fin di aña 2017 i e aña 2018 pa Kòrsou i Sint Maarten. Romero a splika ku esaki no por konta mas pa Sint Maarten, debí na e desaster ku Irma a kousa. Pero e no ta di opinion ku e desaster lo kousa problema grandi pa Kòrsou den un union monetario ku ta eksistí pa Sint Maarten. ‘Mi no ta kere esei. Mi ta kere ku Sint Maarten lo konstruí nan pais atrobe.’
Bron Extra