PHILIPSBURG.- Ayera tardi pa bai kue anochi orkan Maria a pasa ku su furia di bientu i áwaseru banda dje isla di St. Maarten, komo tambe e islanan di Saba i St. Eustatius.
Na St. Maarten tabatin 11 “shelter” habrí, i kual tabata ser manehá dor di Rode Kruis, militarnan i boluntarionan lokal dje isla.
Asina ku orkan Maria kaba di pasa, e militarnan ta sali pa duna seguridat na negoshinan, pòmpnan di gasolin i bankonan.
A hasi palabrashon ku outoridatnan lokal di St. Maarten i tambe servisionan di seguridat di manera ku por reakshoná na tempu i lihé, asina evitá ku negoshinan ta keda sakia.
E focus aktualmente ta keda riba seguridat. Militarnan ta sigui hasi patruya den kayanan i tambe ta ofresé yudansa unda tin mester.
Haf i aeropuerto ta sera i ta spera ku pa djaweps mainta awor nan lo ta habri.
E pakete di mas grandi di kuminda a keda entrega i tin sufisiente kuminda pa e dianan ku ta bin. Kalidat di koriente i awa no ta bon ainda pa konsumo, segun Defensa, i higiena ta bai atras, dor di kual tin chèns pa malesanan por oumentá.
Pa loke ta trata Sint Eustatius en Saba, nan tambe a habri ‘shelter’ i kada isla tin dos. Militarnan ta riba e dos islanan pa seguridat i tambe pa asistí polis i hustisia.
Entre tantu na Den Helder, Ulanda ta yenando e barku Zr.Ms. Karel Doorman ku ekiponan pisa manera krannan pa hisa kos pisa, trùknan i otro trùknan pa trabounan pisa. Tambe hopi produkto i material di yudansa lo keda pone abordo di e barku aki ku awe ta Sali for di Ulanda rumbo pa St. Maarten.
Bron: Extra