WILLEMSTAD.- Minister di Salubridat, Medioambiente i Naturalesa, Mr. Suzy Camelia-Römer, no ta muchu kontentu i por bisa ku el a kuminsá pèrdè pasenshi ku SONA. Esei pa motibu ku e tin basta tempu ta pidi informashon riba e situashon finansiero rondó di konstrukshon di e Hospital Nobo Otrobanda pero sin ku ta dun’é esaki.
Ayera den un enkuentro ku prensa e mandatario a laga komprondé bon kla ku e no ta bai spera masha tempu mas riba SONA i ku dado kaso nan no por produsí e informashon ku e a pidi, ku lo entamá otro pasonan. Segun Camelia-Römer, tin henter un tim di supervishon ku a keda nombrá den e kaso aki pa sirbi interesnan di gobièrnu komo un sorto di intermediario, pero esaki tampoko no ta risibiendo informashon. Esaki a pone ku el a disidí di pidi un reunion ekstraordinario di Konseho di Minister pa atendé e asuntu aki.
Mas aleu el a splika ku, den e reunion ei el a pidi e mandato pa pone un ultimátum pa gobièrnu por risibí informashon di SONA, pasobra personalmente e ta haña ku, si e tin dos luna kaba den un funshon i e ta pidi sierto informashonnan ku e tin derechi riba dje sin por haña esakinan, anto e ta kere ku ta yega un momentu ku lo manda un atvertensia, i despues si ta nesesario un otro apelashon pa motibu di falta di kumplimentu pa por haña e informashon. Lamentablemente ainda e no a risibí e informashon finansiero ku e tin mester di dje pa e na su turno tambe por responsabilisá e plakanan ku gobièrnu ta hinkando den konstrukshon di e hospital nobo. E lo ta deseá di traha un reto pa e por informá Parlamento unda ta pará presis, pero si e no tin e informashon ei e no por deklará nada, siendo ku gobièrnu ta responsabel si.
Segun e minister, ora ku el a pidi kuenta i rason na SONA, ku ta esun ku ta atendé ku e fondonan, el a komprondé ku despues di e konflikto ku esaki tabatin ku Berenschot, e último aki a keda ku tur loke ta datonan atministrativo.
Pero segun e minister, esei no ta su problema, sino ku SONA mester a bai korte ku nan pa reklamá un ke otro. E komo mandatario tin di haña e informashon pa e responsabilisá esaki den Parlamento despues. For di momentu el a sinta komo minister, el a reuní na diferente okashon kaba ku SONA sin a haña kontesta riba loke e ke.
El a manda diferente karta, e ta haña kontesta si, pero no kontesta riba su preguntanan. No por keda reuní mas sin ku e kontestanan deseá ta bini.
Pero finalmente Konseho di Minister a disidí ku lo bolbe manda un karta, pero e biaha aki inkluyendo un ultimátum ku ta eksigí pa haña informashon, sino lo bai pa e siguiente pasonan ku ta mas serio
Bron: Extra
WILLEMSTAD.- Komo minister den un proyekto grandi manera esun di konstrukshon di Hospital Nobo, e lo no por bai siegamente tras di palabra di otronan i bisa ku ta na novèmber 2018 e hospital aki lo keda kla. E ta kere ku e tin di verifiká sierto kosnan promé pasobra no mester lubidá ku e ta ser tené responsabel pa e proyekto n’e momentunan aki. E ta konsiderá esaki algu serio, ku ta para riba polítika. Asina Minister di Salubridat Públiko, Medioambiente i Naturalesa, sra. Suzy Camelia-Römer, a duna di konosé durante un enkuentro ku prensa ayera tardi. Segun e mandatario, riba plano polítiko lo tin miembronan di Staten ku lo por para na kantu i reklamá, pero den e trabou di minister bo tin di hasi e kosnan hopi na serio pa bo por responsabilisá esakinan na e momentu ku esei presentá.
For di momentu ku el a sinti e informashonnan, prinsipalmente informashonnan riba e situashon finansiero di HNO, no ta bini sufisiente riba mesa. Tin trayektonan di transishon ku a ser pará i ku mester start di nobo. Es mas, ora ku puntra si sierto kompanianan tin TOR, ta resultá ku esei no t’e kaso. Pues asina por bisa ku tin informashon i akshonnan balioso ku no ta tuma lugá. I e tim ku a ser apuntá komo intermediario entre gobièrnu i SONA no ta haña informashon tampoko. SONA ta preferá di pèrdè tempu kuestionando e ròl dje supervisor aki en bes di duna e informashon ku minister ta pidi. No mester lubidá ku e gobièrnu aki a fia no ménos ku 420 mion florin, ku pueblo tin di paga bèk por sierto, nos tur ke tin un hospital na drechi, anto no por duna informashon relevante. Ta ser bisá ku pa novèmber 2018 Hospital Nobo lo ta kla. Pero manera e situashon ta e no por bai siegamente tras di palabra di otro sin ku e tin e informashonnan deseá.
Segun e minister, responsabilisashon finansiero a algu ku ta masha normal den e tipo di kasonan aki, sigur den un proyekto grandi manera HNO. SONA si ke pa e firma pa kumpli ku un ‘claim’ di basta mion florin, pero no ta produsí informashon finansiero. SONA no ke duna un splikashon pa kaba, no opstante ku e tin komo dos luna sintá kaba den e funshon. Asta den kaso di e ‘claim’ aki ta kere ku mester bai korte i ku e suma lo por baha konsiderablemente.
El a splika mas aleu ku, gobièrnu ta esun ku a akordá ku SONA pa manehá e proyekto. SONA na su turno a sera un akuerdo ku USONA/Berenschot pa e parti di ehekushon i manehá. USONA a sera akuerdo ku diferente kompania pa manehá e kontraktnan. A surgi un konflikto i asina SONA a kibra kontrakt ku USONA, pues e mes lo a keda enkargá ku e proyekto.
E tempu ei e minister dje tempu ei (Zita Jesus-Leito) a mustra nan ku ketu bai pa gobièrnu ta SONA ta ser tené responsabel pa ehekushon di e proyekto. Pero teniendo kuenta tambe ku gobièrnu tabatin un intermediario pa kontrolá loke a sosodiendo, a nombra e supervisor i regisor den persona di Stanley Betrian. Mester tin un persona òf órgano asina na nòmber di minister, sino minister no por traha.
Bron: Extra
A sera kranchi di plaka pa kontinuá ku Hospital Nobo
WILLEMSTAD.- E proyekto di Hospital Nobo Otrobanda (HNO) finalmente lo bai sali un tiki mas karu di loke a kalkulá, pero sigur e lo no bai sali dòbel. Gobièrnu di Kòrsou a fia 420 mion florin pa konstrukshon di e instituto aki, i ekspertonan ta kalkulá ku e kosto total lo bai ta un 15 porshento mas tantu. I asina mes e ta kere ku ta hopi. Pero e informashon riba e situashon finansiero di parti di SONA ta importante pa kontinuá. Pero teniendo kuenta ku esei no ta sosodiendo, Departamento di Finansa a disidí di sera kranchi di plaka te ora ku haña e relato. Asina e Minister di Salubridat, Medioambiente i Naturalesa, sra. Suzy Camelia-Römer, a duna di konosé durante un enkuentro ku prensa e siman aki. Segun sra. Camelia-Römer, te asina leu ku el a komprondé, e edifisio di e hospital, huntu ku aparatonan i mobilario aserka lo mester sali un 420 mion florin.
Di otro banda, di SONA el a komprondé ku nan ta spera ku e gastunan lo surpasá e presupuesto no mas ku 15%. Pero esei mes e ta kere ku ta hopi, i e lo ke sa ta a base di kiko nan ta pensa ku e presupuesto lo ser surpasá asina tantu. Ta p’esei mes e komo minister i esun ku finalmente ta responsabel pa e fiansa ku gobièrnu, e mester sa primeramente di arkitektonan kon ta pará ku e konstrukshon, i na di dos lugá e mester haña un bista kiko ta e situashon finansiero. I e último aki ta informashon ku e tin di risibí di SONA. Ta ora ku tin bista riba tur esakinan lo por sa kiko mas falta i kuantu e lo bai kosta finalmente. Ku e proyekto aki di HNO lo bira dos biaha mas tantu, e ta sigur ku esei lo no ta asina.
Teniendo kuenta ku e informashonnan ku ainda tin di bini, e Departamento di Finansa no a manda mas plaka pa SONA pa kontinuá ku e proyekto. Finansa tambe ta wardando riba e responsabilidat finansiero. P’esei segun e minister, el a pidi e departamento pa e tambe haña un bista di kiko a ser pagá kaba den kuadro dje proyekto aki. En todo kaso SONA a haña sèn pero no tur sèn, ya ku manera ta normal den kualke proyekto grandi, e plaka ta bai den ‘tranche’, i e siguiente ‘tranche’ a wanta kuné. Ta di komprondé ku den un proyekto manera esaki no ta hisa tur e plaka i duna SONA. Pero pa nan risibí e siguiente montante, nan lo tin di responsabilisá nan mes pa loke a sosodé te awor.
Pero segun e mandatario, no opstante ta tumando e pasonan ei e lo no sinta warda te ora ku kosnan bai pega, pasobra si kosnan pega gobièrnu ta hañ’é obligá di duna un parti tòg pa e trabounan sigui. E no ta pretendé ku kosnan a bai robes ku e responsabilisashon finansiero di parti di SONA, pero ta simplemente e ke mir’é, e tin derechi di hañ’é pa e na su turno por duna kuenta i rason na pueblo.
Bron: Extra
