WILLEMSTAD.- Minister di finansa sra. Lourdes Alberto a bisa ku e ta spera ku su ministerio lo para 100% su tras i asina sigur e sa ku trabounan lo kana pa 75%.

E kartera di finansa ta kai bou di independiente den parlamento dr. Eduard Braam.

Señora Alberto a studia na Kòrsou UNA i a traha 15 aña na PriceWaterhouseCooper pa despues e lanta su propio negoshi Louanne Financial Services N.V.

Señora Alberto a bisa ku for di basta tempu e ke a drenta e aparato gubernamental, pasobra e tin su vishon kon kos mester bai. Su punto di lansa na e momentu aki ta belasting ku ke bai hasi algu kuné. Kiko e kos ta, e no ke a divulgá ayera despues di a huramentá.

Sra. Alberto tambe a bisa ku e tabatin hopi preparashon. For di den e siman ku ta tras di lomba el a kuminsá traha i a haña informashon di kosnan habrí ku tin di bai atendé. E no ke divulgá kiko esaki ta i nan status i kua e lo pone prioridat na dje. Pero e idea ta ku lo pone un lista di prioridat.

E mandatario a bisa di lo sinta ku tur esnan konserní pa sa dikon sierto kos ainda ta pará i pa nan kana.

“Kisas ora tin e lista di prioridat, lo mi traha “werkgroep” pa atendé ku nan, pasobra e trabou ta hopi”.

E idea ta pa hasi mas tantu posibel den ménos tempu. “Mi lo hasi apelashon entrante djaluna awor riba mi departamento pa mi tin nan 100%, pará mi tras. Pasobra ora bo tin trahadónan 100% bo tras, pa 75% e trabou ta kla”.

Ademas tin di wak proyektonan wantá. Wak proyektonan ku ta duna empleo, pasobra desempleo ta haltu den nos pais. I tambe wak pa e kaha di gobièrnu haña su “input” nesesario, e mandatario a indiká.

A puntra minister Alberto kon e ta mira posishon di sr. Ensley Tromp presidente di Banko Sentral, ku resientemente no a pasa screening na St. Maarten, e mandatario a bisa ku e no por bisa nada.

Bron: Extra