WILLEMSTAD.- Minister di Hustisia, mr. Quincy Girigorie, a manda un mensahe bon kla pa esnan den baho mundu, i esei ta ku kimamentu di outo di miembronan den e kadena hudisial lo no sirbi komo intimidashon.

Nan lo sigui hasi nan trabou normalmente i lo no ser intimidá dje forma aki. Manera ta konosí, e siman aki di un forma misterioso outo di un hues ulandes a pega na kandela, i tin sospecho fuerte ku esaki tabata un akto intenshonal, sigur si tene kuenta ku esaki a bira e ‘modus operandi’ di esnan den baho mundu.

Segun Minister Girigorie, e por konfirmá ku tin un investigashon andando den kaso aki tambe, meskos ku otro kasonan di kimamentu di outo di siudadanonan. Pero asina ku e investigashonnan a terminá i ku e tin informashon di Ministerio Públiko, e lo por kompartí esaki ku komunidat. Loke tambe e por bisa den e kaso aki ta ku, por nota ku tin un tendensia kla pa intimidá miembronan den e kadena hudisial.

Si ántes tabata intimidá polisnan di diferente forma, despues a toka turno na bosero di Ministerio Públiko (Normal Serphos) i ta parse ku awor a yega na turno di huesnan. Pues por nota ku tin un sierto tendensia, tin un sierto patronchi den esaki. E úniko interpretashon ku por duna na esaki ta ku, for di baho mundu ta trata di intimidá entidatnan hudisial. Pero e por bisa bon kla ku ni e hues en kuestion ni e personal dje otro entidatnan hudisial lo no keda intimidá dje forma aki.

Ta lógiko naturalmente ku a regla èkstra seguridat pa e hues en kuestion, i tambe Korte Komun a tuma su propio paso i medidanan pa loke ta seguridat di su miembronan. Kimamentu dje outonan tantu di e hues komo dje bosero di OM no ta sirbi komo intimidashon, aunke esei lo t’e deseo den baho mundu. Pero asta por bisa ku nan trabou lo bai kontinuá fuertemente, normalmente, i e lo ta un estímulo pa nan bai hasi nan trabou aun mas mihó i di akuerdo ku nan konsenshi pa e komunidat aki.

Segun e titular di hustisia, no por permití ku baho mundu ta sigui intimidá nos entidatnan dje forma aki. Gobièrnu lo no aseptá esaki tampoko! Lo kontinuá ku e investigashonnan te na momentu ku detené i husga esnan responsabel. Lo no tolerá ningun forma di intimidashon riba miembronan di Kuerpo Polisial, no di Ministerio Públiko, ni di Korte di Hustisia, pasobra ta nan ta yamá pa trese i mantené trankilidat den e komunidat aki.

Bron: Extra