WILLEMSTAD.- “ Mi ta trankil. Awe mi ta bai buska e rapòrt di Kontrolaria General pa wak. Mi tambe a tuma nota di e notisianan den medionan di komunikashon i sosial.

Despues lo mi duna un komentario”, esaki tabata reakshon di minister enkargá ku SOAW sra. Ruthmilda Larmonie-Cecilia na EXTRA.E deklarashon di e titular di SOAW ta relashoná ku publikashon di e rapòrt di Kontrolaria General, unda ta bisa ku no ta tur e kompromisonan finansiero a keda hasí konforme e outorisashon otorgá.

Mas aleu señora Larmonie- Cecilia a bisa despues di tuma nota di e rapòrt, e lo bai wak kon e proseso a kana i lo reakshoná den un rueda di prensa. Un reakshon riba e asuntu di e proyekto di “Mi Fishi” ku tabata presupuestá pa 80 mil florin a bira 300 mil florin, e minister a indiká di lo kontesta esaki tambe den un rueda di prensa ku e lo bai tene, despues di a studia e rapòrt.

Kontrolaria general a indiká den konklushon di su rapòrt ku no ta tur e kompromisonan finansiero a keda hasí konforme e outorisashonnan otorgá

A base di loke Kontraloria a konstatá, e ta di opinion ku algun di e kompromisonan finansiero a keda hasí na un manera ku no ta konforme e outorisashonnan otorgá. Esaki lo mester tabata e kaso serka shete di e nuebe ministerionan.

Internamente, no tin sufisiente kontrol pa wak si un persona ku ke hasi un kompromiso finansiero ta outorisá pa hasi esei. Por ehèmpel, tabatin lista di firma ku no a keda remplasá na tempu, i tantu minister di Desaroyo Sosial, Labor & Bienestar (SOAW) komo minister di Enseñansa, Siensia, Kultura & Deporte (OWC&S) a keda strukturalmente sin kumpli ku e prohibishon di hasi kompromiso finansiero nan mes. Minister di Hustisia i minister di Salubridat, Medio Ambiente & Naturalesa tambe a yega di firma ‘bestelbon’ insidentalmente.

Minister Larmonie- Cecilia ta un dje ministernan pa partido Pueblo Soberano den próksimo gabinete Koeiman, i lo ta enkargá posiblemente ku kartera di BPD.

Bron: Extra