WILLEMSTAD.- Segun minister di Desaroyo Ekonómiko Eugene Rhuggenaath Kòrsou tin bon relashon ku Cuba, e pais ku ta habri su merkado. Rhuggenaath: ‘Por mira e promé logronan bou di nos kompanianan di gobièrnu.

Tin dil riba nivel gubernamental ku Cuba. I hopi be nan ke akoplá nan kompanianan di estado ku nos kompanianan. Tin algu spesífiko ku nan a menshoná kaba, pasobra nan ke bai riba trayekto pa laga nan kompania di estado mas outónomo. Ta lokual nos ta yama “verzakelijking”.” Segun Rhuggenaath ta kosnan ku nan por siña for di Kòrsou.

‘Spesífikamente Cuba a menshoná Aqualectra. Nan a investigá i tin kosnan ku Aqualectra ta hasi riba tereno di energia renovabel ku nan no tin awor aki i nan ke interkambiá riba esei.”

Rhugenaath a bisa ku e ta spera ku riba término kòrtiku Cuba lo firma un akuerdo ku CPA tokante kolaborashon pa desaroyo di puertonan. Rhuggenaath: ‘Curaçao Airport Holding meskos pa aeropuerto. Pasobra einan nos tin eksperensia. Ta bon pa nos selebrá nos mes logronan. Nan a mira kon nos tin un operador privá ku ta traha den relashon ku un kompania di estado. Kual nan ke hasi tambe na Cuba. Nan ke pa Curaçao Airport Holding duna nan guia den esei.” Rhuggenaath a sigui bisa: ‘Curoil tambe a sera un Memorandum of Understanding (MOU) ku Cuba. Cuba ta mira ku Curoil por suministrá sierto produkto di kombustibel pa Cuba, ku nan no tin akseso na dje awor aki. I tambe proseso di bunkering; ta un trayekto ku Curoil tin eksperensia den dje. Nan ke desaroyá esei. I den e MOU ku a sera ku Curoil ta bai usa nos ekspertisio pa desaroyá bunkering. Na Cuba mes, pero tambe nan ta mira potensial pa traha huntu pa proyekto den otro paisnan ku nan ta yama “El Gran Karibe”.

Bron: Extra