WILLEMSTAD.- Minister Suzy Camelia-Römer di Ministerio di Tráfiko, Transporte i Planifikashon Urbanisashon ta determiná pa atendé ku Baoase i den área di Pietermaai.

E mandatario a indiká ku atrobe el a tuma nota ku na Baoase tabatin un hèki skùin, pero ku a bira règt. Tambe tin algun palu riba e playa ku ta stroba paso. Tur esakinan tin di bai. Meskos e minister a tuma nota ku a pone yen di baranka pa stroba hende kana. Esakinan tambe tin di keda eliminá. Si ta gobièrnu tin di bai eliminá e opstákulonan aki, esaki lo ta riba gastu di esnan ku a poné, minister Camelia- Römer a indiká.

E minister ta kere ku pueblo mester yuda den mèldu kosnan ku no ta bon, pasobra un minister no por ta tur kaminda.

“Mi a tuma nota ku ta kita opstákulo otro ta bolbe bin. E laman for di Baoase te na Boca Simon mester ta liber”, e mandatario a bisa.

E minister a anunsiá ku segun e lei di buki 5 di lei sivil artíkulo 26 ku ta bisa ku tin un ambiente públiko, un playa òf parke, si un gobièrnu disidí ku ke bai ser’é e mester bai parlamento. Ta bon pa sa esaki pasobra ora e bai parlamento, e ta bira un diskushon públiko.

E mandatario a sigui bisa ku e no ta mira dikon na Kòrsou so su playanan no por ta liber manera na Aruba i St. Maarten.

Pa ku e área di Pietermaai, minister a indiká ku tur hende a traha riba kosta di pueblo, ta nan tin un problema i no e komo mandatario.

E mandatario a konstatá ku den Pietermaai tin dos/ tres kaminda ku a traha i yega te na laman. Esakinan mester bai atendé. Esnan ku a traha yega te laman ta nan tin problema, i no e minister. P’esei el a laga midi dor di DROV den Pietermaai, te na unda kosta ta. Esun ku traha den liña ku ta kai den área di kosta, minister ta bai atendé. A habri un ‘steegje’ den área di Pietermaai tambe, e minister a terminá bisando.

Bron: Extra