WILLEMSTAD.- “Komo mayoria den Parlamento awor nos ta den kombersashon ku Gobièrnu di Reino. Mi a komprendé ku tin chèns ku nan lo no risibí nos. Ta oké.

Pero nos lo sigui kana nos kamindanan pa buska derechi demokrátiko pa nos pais Kòrsou. No ta tur pais tin demokrasia. Nos ta tin’é, nos tin ku salbaguardi’é.”

Asina lider di Movementu Progresivo Marilyn Moses a bisa ayera despues ku el a entregá lista di kandidato di su partido na Kranshi.

Moses a splika ku pa su persona ta importante, “ku ta un di nos prinsipionan básiko ku nos lo no violá: Prinsipionan bo no ta negoshá. Demokrasia, bo mester respetá.”

Segun Moses un di e prinsipionan básiko di Movementu Progresivo ta “igualdat polítiko”. “Esaki ta nifiká ku si pueblo ta skohe e representantenan den Parlamento, nos tin ku respetá nan igual. Nos no tin mas poder ku niun. Pueblo ta duna kada parlamentario e poder igual pa asumí responsabilidat. Ku ta nifiká ku sòru ku lo tin un gobièrnu aki, ku ta hiba e pais aki dilanti. Tambe sòru ku lo tin un mayoria ku por sostené gobièrnu. Anto nos tin ku respetá otro. Rèspèt ta kuminsá den parlamento. I for di Parlamento bo por mira esaki reflehá den bo pais. Aworakí tur kos ku bo ta mira ta desunion. P’esei nos lema ta: “Union ta e solushon.”

Tokante lista di Movementu Progresivo (MP), Moses a bisa ku su persona ta keda riba posishon number 1. Riba number 2 ta Gassan Dannawi, eks- parlamentario pa partido MAN. Hunnely Felicia, ku tabata riba posishon number 2 di Movementu Progresivo pa e elekshon di 2016 no ta riba lista a aña aki mas. Esaki tin di aber pa motibu privá”.

Moses a splika ku e ta kontentu ku partisipashon di Gassan Dannawi riba lista di MP. “Den pasado el a aserká mi pa drenta MAN. Semper mi a konsiderá Dannawi komo un hòmber simpátiko i sinsero. Mi persona a bisa ku mi tabatin un yamada pa un partido polítiko pa trese un kambio. Mi ta kere ku un forma di polítika, ku énfasis riba union den pueblo i respetando otro, ta posibel. Huntu ku Dannawi i tur otro riba lista mi lo traha pa esaki.”

Bron: Extra