Extra | Nèstòr di periodismo Paul Soliana (69) a bai sosegá

Nèstòr di periodismo Paul Soliana (69) a bai sosegá | Extra

WILLEMSTAD.- Despues di un lucha balente i fuerte, ayera mardugá a bai sosegá e periodista Paul Soliana. Paul tabata konosí komo un periodista ku opinionnan skèrpi den un trayektoria di mas ku 40 aña den periodismo.

El a kuminsá traha na EXTRA, despues a bai Ultimo Noticia kaminda e tabata redaktor en hefe pa hopi aña pa despues bai kaba su karera na e emisora Curom Z-86. E tabata tambe un kolaborador di EXTRA durante algun aña.

Paul Soliana a nase na Kòrsou dia 18 di desèmber 1947. Su tata ta un polítiko aktivo, tantu na Boneiru i ántes den Antia. Su rumannan tambe ta konosí pa nan trayektorianan amplio na Kòrsou, manera entre otro defuntu abogado Ernst Soliana i eks-gezaghebber di Boneiru, George Soliana.

Den añanan 70 i 80 e tabata masha aktivo ku e organisashonnan di prensa di e tempu ei, manera Sosiedat di periodista di Kòrsou (SOPEC) ku tabata organisá diferente aktividat, no solamente na Kòrsou pero tambe riba e otro islanan di loke ántes tabata Antia. E tempu ei tabatin un interkambio frekuentá entre e defendé organisashonnan di prensa. Paul Soliana pa su trabou a bishitá diferente kongreso i konferensia den reino mes i tambe internashonalmente. E tabatin un pèn skèrpi loke a resaltá den e añanan ku e tabatin skibi tur dia un kolumna ku e nòmber di A te Z. Banda di esei e tabata bishitá diferente konferensia di prensa, entre otro na Konseho di Minister kaminda e tabata respetá pa su preguntanan krítiko. Paul Soliana tabata hasi e preguntanan ku otronan no tabata hasi loke a duna realse na e manera ku e tabata ehersé su profeshon. Sin miedu pero ku konsiderashon. Pa Paul no tabatin kaminda meimei. Ta un kontesta tabatin p’e: sea si òf nò.

E tabata un hende masha lesá i por lo tantu tabata sa hopi di tantu desaroyonan interno komo internashonal, un aspekto masha importante pa práktika periodismo na un nivel haltu. E tabata tambe un amante ferviente di deporte, entre otro futbòl, beisbòl, basketbòl i futbòl merikano. Komo gran fanátiko di Yankees e tabata defendé su tim ku fervor, den tempu bon i den tempu malu. Papia malu di su tim tabata nifiká krea un enemistat momentáneo.

Paul Soliana a bira malu dia 23 di desèmber último i e no a regresá trabou mas. Dia promé di aprel último tabatin un Santa Sakrifisio di Misa bon bishitá pa resa pa su mehorashon. Su kondishon sinembargo a sigui bai atras i finalmente e no a rekuperá. Ayera 03.40 el a bai sosegá den brasa di Señor. E tabatin 69 aña.

E akto di despedida di Paul Soliana lo tuma lugá djaweps awor di 9’or pa 11.30’or di mainta. Lo tin oportunidat pa tuma despedida di e gran periodista aki na Misa di Santa Famia. Despues lo hiba Paul Soliana su último lugá di sosiegu den un seremonia ku lo tuma lugá den sírkulo familiar.

EXTRA ta manda palabranan di kondolensia pa su famia, koleganan, amigunan i tambe konosínan. Pas na su alma.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *