WILLEMSTAD.- Den e komunidat aki loke mester stop di hasi un tiki ta di kibra tur loke otro bini kune na proyektonan grandi. I esaki ta algu ku konstantemente ta ser hasi. Asina den komunidat a trata di kibra proyektonan manera BOO, Hospital Nobo, Banko Sentral, Prizon, tempu di Curoil, i awor tambe Refineria Isla.
Esei di akuerdo ku sr. Hensley Koeiman di frakshon di MAN durante e reunion publiko di ayera mainta. Segun Koeiman, kada bes ku tin un of otro proyekto ku ta nifika progreso pa Korsou, ta purba di kibr’e. Pues e ta kere ku lo mester buska un manera pa stop ku e kos ei, ku konstantemente ta pone tur proyekto na diskushon, pero no diskushon sano sino diskushon ku intenshon pa kibra.
Pero un forma pa stop ku e tendensia aki ta dor di ser transparente via di prensa ku ta imparsial i tambe esnan kritiko. Den e kaso aki di e desaroyonan rondo di Isla e pueblo ta hopi konfundí, pasobra e no sa kiko ta e berdat. Informashon ta bai afo, hendenan ta kritiká i zundra i lastra bo sin sa kiko ta e berdat. Pero segun Koeiman e ta kere ku e pueblo tin derechi di sa kiko ta pasando, pasobra mester yega na trankilidat tambe.
Pero e ta lamenta ku riba un topiko asina importante manera e Heads of Agreement ku Guangdong Zhenrong tin tantu diskushon i interogante.
E ta kere ku tur hende ta di akuerdo ku ta importante pa nos tin un refineria ku ta produsi energia limpi i ta kumpli ku kondishonnan moderno. Den un kaso asina por papia di durabilidat i energia sostenibel, ku ta tene kuenta ku hende.
Segun Koeiman, normalmente un Heads of Agreement no ta komprometedor a menos ku bo mes hasie asina. Mester rekonose ku aki ta dil ku kompanianan grandi, ku kos serio. Pues e lo ke sa si no por inklui den e dokumento aki un parti ku ta krea e posibilidat pa terminashon di kontrato si un of otro partido no kumpli. Kisas den un kaso asina e otro partido lo tin di rekompensa si e gastunan ku ta hasi kaba.
Mas aleu tambe el a puntra si e sifranan den e dokumento ta korekto. El a pidi tambe un lista kronológiko di loke ta bai sigui despues di e Heads of Agreement aki. Ademas e lider di frakshon di MAN a pidi un splikashon tambe riba e dikon mester tin sekresia ront di e akuerdo aki.
Bron: Extra