WILLEMSTAD.- Enseñansa grátis no por ta pa esnan ku por paga. Esei ta loke e parlamentario Omayra Leeflang, lider di Un Kòrsou Hustu a bolbe deklará e siman aki. Por sierto su deklarashon ta un ripitishon di un punto di bista ku el a ekspresá na diferente okashon.

Sra. Leeflang a bisa tambe ku el a duna palabra na mesa ku no ta duna informashon riba e proseso ku ta kanando pa formashon di gobièrnu. “Ora Un Kòrsou Hustu duna palabra, nos ta mantené nos mes na esei. Nos si ta si i nos nò ta nò”, asina e dirigente polítiko ta bisa. Remarkabel ta ku otronan si ta hasiendo deklarashon, manera lider di Pueblo Soberano Jaime Cordoba, aktual minister, a hasi den e programa di e partido djasabra anochi.

Un di e puntonan ku tin hopi interes p’e dado kaso Un Kòrsou Hustu drenta gobièrnu ta e punto di enseñansa liber. Ta konosí ku e punto aki ta un kabai di bataya importante di Pueblo Soberano. Ku sra. Leeflang na e kartera eventualmente di enseñansa ta surgi e pregunta si lo mantené e konsepto aki ku básikamente e parlamentario a bisa ku ta un punto di prinsipio i no a sosten’é den pasado. Opservadornan polítiko ta konsiderá ku e punto ei por bira un klèsh pa partisipashon di e partido Un Kòrsou Hustu den gobièrnu. Ademas Pueblo Soberano a bisa kaba ku bou di ningun kondishon lo aseptá ku ta mishi ku e parti aki. Esei ta ratifiká tambe den e akuerdo di gobernashon.

Den dos entrevista e siman aki na diferente medio, tòg e parlamentario a duna algun informashon, entre otro pa loke ta trata e konsepto di enseñansa liber. Sra. Leeflang a ripití su punto di bista ku na su opinion esnan di ménos rekurso mester haña buki i pago pa tur aspekto di enseñansa. “Ta un punto ku nos a mantené semper. Semper e situashon tabata asina aki kaba. Un hende ku tin sufisiente entrada no ta haña un kas di pueblo, no ta haña ònderstant, no ta haña kuido médiko grátis. Ta un sistema masha normal den nos komunidat ku tin palabrashonnan a base di entrada ku e hende tin. E liña tei den tur sirkunstansia”.

Ayera e kandidato ku tabata menshoná pa bira minister di MAN, Elsa Rozendal a indiká ku stabilidat di Gobernashon ta krusial pa garantisá 4 aña di gobernashon di gabinete Koeiman. “Kontrali na e persepshon ku a keda kreá den un matutino di djaluna mainta, Elsa Rozendal ta respetá e desishon ku partido MAN a tuma relashoná ku e kartera ku e partido ta mira importante pa keda kuné.

Elsa Rozendal a i ta sigui duna su koperashon kompleto pa partido MAN yega na e ampliashon di koalishon pa por garantisá 4 aña di gobernashon di gabinete Koeiman. Esaki ta e úniko forma pa partido MAN garantisá Pueblo di Kòrsou ehekushon di e Akuerdo di Gobernashon ku a keda firmá dia 15 di desèmber último.

Un Akuerdo di Gobernashon ku ta pone Dignidat Humano sentral. Algu ku nos Pueblo a bin ta anhelá asina tantu p’e. P’esei ta imperativo pa partido MAN skohe e karteranan ku por yuda garantisá ehekushon di e Akuerdo di Gobernashon ku tur e partidonan ku ta forma koalishon a firma”, asina e ta bisa den su mensahe. Huntu ku su punto di bista el a pone un foto di dje i sra. Leeflang.

Bron: Extra