WILLEMSTAD,- Kompania Curategic Investment BV, ku ta establesé na Kòrsou, no por obligá pa paga su kapital na akshon den un proyekto pa konstruí un hotèl na e tereno di Rif na Otrobanda. Esaki wes a diktá siman pasá.
Na aña 2012 un grupo di kompania a yega na un akuerdo pa konstruí un hotèl i kasino riba tereno di Rif ku ta pegá ku SVB. E akuerdo ta pa konstruí un Courtyard Marriott Curaçao ku kasino. Kompanianan Curategic, huntu ku Vidanova Pension Fonds, Pension Fund Isla Curaçao i Gold Investment Curaçao a yega na un akuerdo pa kumpra akshon pa partisipá den e konstrukshon, pa un montante total di 11 mion US dòler.
Te ainda konstrukshon no a kuminsá. Aña pasa Vidanova i Isla Pension Fund a duna di konosé ku nan no ke sigui ku e proyekto i no ke paga e kapital di akshon. Curategic tambe a ninga su kontribushon.
Gold Investment Curaçao huntu ku CMC Real Estate, ku ta e kompania di konstrukshon pa e hotèl, a bai korte pa fòrsá Curategic pa tòg paga su kapital di akshon, esaki ta un montante di 4,5 mion US dòler. E kaso a keda trata dia 15 di Mart 2017 den korte na Kòrsou. Na promé instansia wes a pidí e partidonan pa sinta na mesa i purba di yega na un akuerdo. Pero e partidonan no a yega na un akuerdo. Despues wes a duna veredikto.
Segun wes no por obligá Curategic pa paga su kapital na akshon. Segun wes esaki no ta hustu. Tambe wes a bisa ku ta straño ku Gold Investment Curaçao huntu ku CMC no a bai korte pa forsa Vidanova i Isla Pension Fund pa paga, pero a bai korte pa forsa Curategic so.
Ku tratamentu di e kaso a bin kla, ku na e momentunan aki, no tin niun kompania interesá pa kuminsá ku konstrukshon di e hotèl i kasino.
Kompania Curategic tin tres direktor. Dos persona ku a nasé na e siudat di Guayaquil na Ecuador, pero ku tin nashonalidat Italiano i un direktor ku ta for di Alemania i ku tin nashonalidat di Aleman. Nan ta establesé na Kòrsou for di 19 di sèptèmber 2012.
Bron: Extra