WILLEMSTAD. – E akusado Siyone Curiel a bisa den korte ayera ku no por usa su derecho di keda ketu, esta “zwijgrecht” pa konden’é. E ta kere ta pa e motibu ei ku el a keda ketu, fiskal a demandá 7 aña di prisòn p’e den e sonado kaso di Sofa, ku ta enserá transporte di droga pa Ulanda.
Dos siman pasá Siyone a keda demandá pa 7 aña di prisòn pa manda mula ku droga Ulanda. Tambe e ta manda droga Ulanda via di kònteiner di maleta di KLM, Ulanda.
Den kaso di Siyone, dia 23 òktober 2015 el a laga un hòmber di fam Randt bai chek-in un maleta ku 15 kilo di kokaina ku mester a bai Bonaire. Den e kaso aki tambe outoridatnan tabatin Siyone bon vigilá. E akusado a splika korto ku un hende a pidi pa opservá si algu ta sosodé. Kiko, pa ken i dikon e mester a opservá, Siyone no ke a papia. E di dos kaso ta di 26 novèmber 2015 el a manda e mula di fam Janzen ku 1562 gram di kokaina pa Ulanda. Janzen a bisa ku e akusado lo a dun’é 5000 euro si e transporte a bai bon. Pero Janzen ta kai.
Ayera e defensor di Siyone, mr. Martina a bisa ku no por definí ròl dje akusado. E no sa kuantu droga ta ser mandá Ulanda. P’esei no por proba komplisidat di transporte droga konhuntamente. Pero fiskal si ta kere ku e kantidat di tap ku tin kaminda e akusado ta papia di transporte, ta sufisiente pa konden’é.
Siyone a bisa wes ku fiskal a pidi 7 aña p’e pasobra el a hasi uso di su derecho di keda ketu. “Nunka mi a komprondé kon por usa zwijgrecht kontra di mi”. Mesora wes a splika e akusado ku ora un hende papia di su kaso, por tene kuenta kuné. Pa e akusado e ta usa “zwijgrecht” pa defendé su mes. Tambe e ta kere si tabatin tim di opservashon riba dje, nan mester a produsí sierto foto di loke nan a pone riba papel komo prueba.
E akusado ke pa wes wak e kaso hopi bon. Tambe el a lamentá ku e tabatin 3 luna na trabou i Tim di Aresto a bin busk’é na su boka di trabou. Den komienso di desèmber korte lo dikta sentensia.
Bron: Extra
