WILLEMSTAD,- ‘Komo partido PAR nos ta respetá resultadonan di elekshon di dia 5 di òktober. Partido ganadó ta partido MAN. Na nos opinion ta e partido ku ta responsabel pa nos ta sigui negoshá pa un gobièrnu nobo.
Komo PAR nos ta partisipá den esaki.’ Ku esaki lider di partido PAR Zita Jesus- Leito ta reakshoná riba lider di partido Kòrsou di Nos Tur, Amparo Dos Santos. Manera ta konosí partidonan MAN, PAR, PNP i Pueblo Soberano ta den proseso di formashon pa un gobièrnu nobo
Dos Santos ayera a bisa ku e ke splika PNP i Pueblo Soberano ‘pa no laga otro partidonan pone preshon riba nan. Pero si bosnan ta bin negoshá ku nos, PNP lo haña 2 minister i Pueblo Soberano tambe lo haña 2 minister. Ke men; no spanta pa bosnan tuma 1 minister. No kai den e ko’i di partidonan ku ta pone bosnan bou di preshon.’ Pa Zita Jesus- Leito proseso di formashon di un gobièrnu nobo mester sigui segun reglanan. ‘No por ta asina ku un partido, den e kaso Kòrsou di Nos Tur, ta negoshá i bin ku proposishonnan tokante repartishon di kartera, via prensa. No por t’asina.’
Na mesun momentu Jesus-Leito ta splika ku e ta komprendé ‘ku Dos Santos ta hopi desapuntá. Dos Santos a spera ku e lo forma parti di un gobièrnu nobo, despues di elekshon di 5 di òktober. Mi por imaginá mi ku e ta desapuntá, pasobra nos lo forma un gobièrnu sin Kòrsou di Nos Tur. I nos lo hasi un trabou ekselente, sigur.’
Jesus-Leito tambe ta reakshoná riba ponensia di Dos Santos, ku a bisa ku PAR ta kome tur partido den un koalishon. ‘Mi ke deklará ku PAR no ta kome ni mata niun partido polítiko. Tur partido ta responsabel pa nan mes maneho. PAR ta un partido ku sa goberná na un manera transparente i tambe ta pone hende kapas riba posishon importante. Tambe PAR semper a traha for di e vishon pa desaroyá personanan.’
Bron: Extra